បរទេស៖ ក្រសួងការពារជាតិរុស្ស៊ី បាននិយាយកាលពីថ្ងៃព្រហស្បតិ៍ថា ឧទ្ធម្ភាគចក្រនៃកងនាវា នៅសមុទ្រខ្មៅរបស់រុស្ស៊ី បានបាញ់ពន្លិចទូកដែលបើកពី ចម្ងាយជាច្រើនគ្រឿងដោយអ៊ុយក្រែន ក្នុងទិសដៅតម្រង់ទៅកាន់តំបន់គ្រីមៀ។
យោងតាមសារព័ត៌មាន RT ចេញផ្សាយនៅថ្ងៃទី១៦ ខែឧសភា ឆ្នាំ២០២៤ បានឱ្យដឹងថា យ៉ាងហោចណាស់មានទូក គ្មានមនុស្សបើកចំនួនបីក្រុម (USV) ត្រូវបានគេប្រទះឃើញកំពុងខិតជិត ដល់ឧបទ្វីបក្នុងអំឡុងពេលថ្ងៃ។ យោធារុស្ស៊ីបាននិយាយថា ឧទ្ធម្ភាគចក្រវាយប្រហាររបស់កងទ័ពជើងទឹក ត្រូវបានបញ្ជូនដើម្បីដោះស្រាយការគំរាមកំហែង និងបានបាញ់ពន្លិចទូក គ្មានមនុស្សបើកសរុបចំនួន ១៥ គ្រឿងនៅក្នុងសមុទ្រ។
យោងតាមក្រសួងការពារជាតិរុស្ស៊ីបានឱ្យដឹងថា ការវាយប្រហារលើកដំបូង បានកើតឡើងនៅម៉ោងប្រហែល ២ រសៀលម៉ោងក្នុងស្រុក។ ឧទ្ធម្ភាគចក្រនៃកងនាវាសមុទ្រខ្មៅ បានបាញ់ប្រហារទូកគ្មានមនុស្សបើកចំនួន ១១ គ្រឿងដោយប្រើកាំភ្លើងនៅលើឧទ្ធម្ភាគចក្រ។ ទូកគ្មានមនុស្សបើកមួយទៀត ត្រូវបានគេប្រទះឃើញ និងកម្ទេចចោលងរយៈពេលមួយម៉ោងបន្ទាប់ផងដែរ។
ការប៉ុនប៉ងវាយប្រហារមួយផ្សេងទៀត ត្រូវបានគេរកឃើញនៅម៉ោងប្រហែល ៧ និង ៣០ នាទីយប់ម៉ោងក្នុងស្រុក នៅពេលដែល USV ចំនួន ៣ ត្រូវបានគេរកឃើញថាខិតជិតតំបន់ គ្រីមៀ (Crimea) ។ ទូកគ្មានមនុស្សបើកទាំងនោះ ក៏ត្រូវបានបំផ្លាញដោយឧទ្ធម្ភាគចក្រនៅ Black Sea Fleet ផងដែរ។
វីដេអូរយៈពេលមួយនាទីដែលថតដោយ នាវិកឧទ្ធម្ភាគចក្រម្នាក់ត្រូវបានចែករំលែកនៅលើ Telegram នៅថ្ងៃបន្ទាប់ ដោយបង្ហាញពីការ បំផ្លិចបំផ្លាញនៃទូកដ្រូនជាច្រើន ៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)