បរទេស៖ យោងតាមការចេញផ្សាយរបស់ RT ទីក្រុងមូស្គូ និងទីក្រុងប៉េកាំង អាចនឹងចុះកិច្ចសន្យាក្នុងពេលឆាប់ៗនេះ សម្រាប់ការសាងសង់បំពង់បង្ហូរមេហ្គា Power of Siberia 2 ដែលគ្រោងនឹងបញ្ជូន ឧស្ម័នធម្មជាតិរុស្ស៊ីទៅកាន់ប្រទេសចិន។
Power of Siberia 2 ត្រូវបានគេរំពឹងថានឹងអនុញ្ញាតឱ្យ បញ្ជូនឧស្ម័នរហូតដល់ ៥០ពាន់លានម៉ែត្រគូប (bcm) ក្នុងមួយឆ្នាំពីតំបន់ Yamal នៅភាគខាងជើងនៃប្រទេសរុស្ស៊ី ទៅកាន់ប្រទេសចិនតាមរយៈម៉ុងហ្គោលី។
ទោះជាយ៉ាងណាក៏ដោយ យោងតាមមន្ត្រីជាន់ខ្ពស់រុស្សី បានឲ្យដឹងទៀតថា ការចរចាថាមពលរវាងទីក្រុងមូស្គូ និងប៉េកាំងមិនត្រូវបានកំណត់ចំពោះ Power of Siberia 2 នោះទេ។
ការថ្លែងនេះធ្វើឡើងនៅពេលដែលប្រធានាធិបតីរុស្ស៊ីលោក Vladimir Putin បានមកដល់ទីក្រុងប៉េកាំងកាលពីថ្ងៃព្រហស្បតិ៍ សម្រាប់ដំណើរទស្សនកិច្ចផ្លូវការ រយៈពេលពីរថ្ងៃបន្ទាប់មកជួបជាមួយសមភាគីចិនលោក Xi Jinping។
លោក Putin និងលោក Xi គ្រោងនឹងពិភាក្សាអំពីទំនាក់ទំនងទ្វេភាគី និងកិច្ចសហប្រតិបត្តិការជាយុទ្ធសាស្ត្រ រវាងប្រទេសទាំងពីរហើយ ឯកសារទ្វេភាគីប្រហែលមួយដប់ត្រូវបានគេរំពឹងថានឹងត្រូវបានចុះហត្ថលេខា ក្នុងអំឡុងពេលនៃដំណើរទស្សនកិច្ចរួម ជាមួយកិច្ចព្រមព្រៀងពាណិជ្ជកម្ម ជាច្រើននិងកិច្ចព្រមព្រៀងក្នុងតំបន់ ៕
ប្រែសម្រួល៖ ស៊ុន លី
