បរទេស ៖ អង្គការក្រៅរដ្ឋាភិបាលមួយបានឱ្យដឹងថា ប្រទេសអ៊ីរ៉ង់បានព្យួរក មនុស្សយ៉ាងហោចណាស់៧នាក់ កាលពីថ្ងៃសៅរ៍ រួមទាំងស្ត្រីពីរនាក់ ខណៈដែលសមាជិក នៃជនជាតិ ភាគតិចជ្វីហ្វ របស់ខ្លួនកំពុងប្រឈមនឹងហានិភ័យ នៃការប្រហារជីវិត ខណៈដែលសាធារណរដ្ឋអ៊ីស្លាម បានបង្កើនការប្រើប្រាស់ការ ដាក់ទណ្ឌកម្មបន្ថែមទៀត។
យោងតាមសារព័ត៌មាន VOA ចេញផ្សាយ នៅថ្ងៃទី១៨ ខែឧសភា ឆ្នាំ២០២៤ បានឱ្យដឹងថា អ្មកស្រី Parvin Mousavi អាយុ ៥៣ ឆ្នាំ ជាម្តាយដែលមាន កូនធំពីរនាក់ ត្រូវបានព្យួរកនៅក្នុងពន្ធនាគារ Urmia ភាគពាយព្យ នៃប្រទេសអ៊ីរ៉ង់រួម ជាមួយបុរស ៥ នាក់ផ្សេងទៀត ដែលត្រូវបានកាត់ទោស នៅក្នុងករណីជាច្រើន ទាក់ទងនឹងគ្រឿងញៀន។ នេះបើតាមអង្គការសិទ្ធិមនុស្សអ៊ីរ៉ង់ដែលមានមូលដ្ឋាននៅប្រទេសន័រវែស ឬ IHR បាននិយាយក្នុងសេចក្តីថ្លែងការណ៍មួយ។
នៅទីក្រុង Nishapur ភាគខាងកើតប្រទេស អ៊ីរ៉ង់ ស្ត្រីអាយុ ២៧ ឆ្នាំម្នាក់ ឈ្មោះ Fatemeh Abdullahi ត្រូវបានព្យួរកដោយចោទប្រកាន់ ពីបទឃាតកម្មលើប្តីរបស់នាង និងដែលត្រូវជាបងប្អូនជីដូនមួយ របស់នាងផងដែរ។
អង្គការ IHR និយាយថា អ៊ីរ៉ង់បានបង្កើនការប្រហារ ជីវិតយ៉ាងហោចណាស់ចំនួន ២២៣ដងនៅឆ្នាំនេះ ដោយមានយ៉ាងហោច ៥០ដងមកទល់ពេលនេះក្នុងខែឧសភា។ ការកើនឡើងថ្មីបានចាប់ផ្តើមបន្ទាប់ពីការបញ្ចប់ នៃពិធីបុណ្យចូលឆ្នាំ Persian និងបុណ្យរ៉ាម៉ាដានក្នុងខែមេសា ដោយមានមនុស្សចំនួន ១១៥ នាក់ក្នុងនោះមានស្ត្រី ៦ នាក់ត្រូវបានព្យួរក តាំងពីពេលនោះមក។
ប្រទេសអ៊ីរ៉ង់ អនុវត្តការប្រហារជីវិតស្ត្រីច្រើនជាងប្រទេសដទៃ។ សកម្មជននិយាយថា អ្នកជាប់ទោសច្រើននាក់នេះជាជនរងគ្រោះនៃការរៀបការដោយបង្ខំ ឬរំលោភបំពាន៕
ប្រែសម្រួលៈ ណៃ តុលា
