បរទេស៖ យោងតាមការចេញផ្សាយរបស់ RT ប្រធានាធិបតីអ៊ុយក្រែន លោក Vladimir Zelensky បាននិយាយថា អ៊ុយក្រែន កំពុងមានតម្រូវការនិងទាមទារ ប្រព័ន្ធការពារដែនអាកាស និងយន្តហោះចម្បាំង បន្ថែមទៀត ពីអ្នកគាំទ្រលោកខាងលិច ដើម្បីសម្រេចបាន សមភាពជាមួយរុស្ស៊ី។
លោក Zelensky បានទទួលស្គាល់ ក្នុងពេលផ្តល់បទសម្ភាសន៍ជាមួយ AFP កាលពីថ្ងៃសុក្រថា ទីក្រុងមូស្គូមានសមត្ថភាពខ្ពស់ណាស់ នៅក្នុងការប្រយុទ្ធលើផ្ទៃមេឃ។គាត់បាននិយាយថា៖ខ្ញុំជឿថាថ្ងៃនេះ យើងមានប្រហែលជា២៥ភាគរយ នៃអ្វីដែលយើងត្រូវការ ដើម្បីការពារអ៊ុយក្រែន ប៉ុណ្ណោះ ហើយខ្ញុំកំពុងនិយាយអំពីការការពារដែនអាកាស។
មេដឹកនាំអ៊ុយក្រែន រូបនេះ បាននិយាយថា សម្រាប់យន្តហោះចម្បាំង ទីក្រុងគៀវគួរតែត្រូវបានផ្តល់ជូន យន្តហោះទំនើបចន្លោះពី ១២០ទៅ១៣០គ្រឿង ដើម្បីកុំឱ្យរុស្ស៊ី មានឧត្តមភាពលើអាកាស។
ក្នុងអំឡុងពេលនៃដំណើរទស្សនកិច្ច របស់គាត់ទៅកាន់ទីក្រុងគៀវ កាលពីដើមសប្តាហ៍នេះ រដ្ឋមន្ត្រីការបរទេសអាមេរិកលោក Antony Blinken បាននិយាយថា ទីក្រុងវ៉ាស៊ីនតោន ផ្តោតយ៉ាងខ្លាំងលើការស្វែងរក និងការបញ្ជូនប្រព័ន្ធការពារ ដែនអាកាស Patriots និងប្រព័ន្ធការពារដែនអាកាស ផ្សេងទៀតទៅកាន់អ៊ុយក្រែន៕
ប្រែសម្រួល៖ស៊ុនលី
![](https://dap-news.com/wp-content/uploads/2020/08/1-1.png)