បរទេស៖ យោងតាមការចេញផ្សាយរបស់ RT នាយករដ្ឋមន្ត្រី Donald Tusk បានប្រកាសថា ប្រទេសប៉ូឡូញ នឹងសាងសង់ខ្សែការពារនៅតាមព្រំដែន របស់ខ្លួនជាមួយប្រទេសបេឡារូស និងរុស្ស៊ីហើយលោកបានបន្ថែមថា ការងារបានចាប់ផ្តើមហើយនៅលើ ‘East Shield’រួចទៅហើយ។
ចំពេលជម្លោះដែលកំពុងបន្តរវាងទីក្រុងគៀវ និងទីក្រុងមូស្គូ មេដឹកនាំប៉ូឡូញបាននិយាយម្តងហើយម្តងទៀត អំពីតម្រូវការដើម្បីការពារប្រទេស ឱ្យកាន់តែប្រសើរឡើងប្រឆាំងនឹង ការគំរាមកំហែងរបស់រុស្ស៊ី។
កាលពីខែមុន ប្រធានាធិបតី Andrzej Duda បានផ្តល់យោបល់ថា ទីក្រុង Warsaw នឹងរីករាយក្នុងការធ្វើជាម្ចាស់ផ្ទះ អាវុធនុយក្លេអ៊ែររបស់សហរដ្ឋអាមេរិកនៅទីនោះ ប្រសិនបើត្រូវបានស្នើសុំឱ្យចូលរួម ក្នុងគម្រោងចែករំលែករបស់ណាតូ។
នាយករដ្ឋមន្ត្រី Tusk បានប្រញាប់ប្រញាល់ទម្លាក់គំនិតនេះ ដោយទីក្រុងមូស្គូបានព្រមានអំពីវិធានការតបត ប្រសិនបើអាវុធប្រល័យលោករបស់ អាមេរិកលេចឡើងនៅតាមព្រំដែនរបស់ខ្លួន ឬសម្ព័ន្ធមិត្តដ៏សំខាន់របស់ខ្លួនគឺបេឡារូស។
ថ្លែងនៅក្នុងព្រឹត្តិការណ៍រំលឹកខួប យោធានៅទីក្រុង Krakow កាលពីថ្ងៃសៅរ៍ នាយករដ្ឋមន្ត្រី Tusk បាននិយាយថា ទីក្រុង Warsaw នឹងធ្វើការវិនិយោគលុយទំហំប្រមាណជា ១០ពាន់លាន zlotys ឬ២,៣ ពាន់លានអឺរ៉ូ (២,៥៥ពាន់លានដុល្លារ) ក្នុងសន្តិសុខនៃព្រំដែនជាមួយបេឡារូស និងរុស្ស៊ី៕
ប្រែសម្រួល៖ ស៊ុន លី
