អាថែន៖ បណ្តាប្រទេសអ៊ឺរ៉ុប ត្រូវការវិនិយោគទ្វេដងរបស់ពួកគេ នៅក្នុងបណ្តាញ ចែកចាយថាមពលត្រឹមឆ្នាំ២០៥០ ឬប្រថុយនឹងការបាត់បង់ គោលដៅនៃការបំភាយឧស្ម័ន ដែលបានកំណត់ ដោយកិច្ចព្រមព្រៀងបៃតងអឺរ៉ុប នេះបើយោងតាមការសិក្សា ដែលបានចេញផ្សាយនៅថ្ងៃពុធនេះ ។
ការវិនិយោគលើបណ្តាញចែកចាយ គួរតែកើនឡើងពីជាមធ្យម ៣៣ពាន់លានអឺរ៉ូ (៣៥,៧៨ពាន់លានដុល្លារអាមេរិក) ដល់ ៦៧ពាន់លានអឺរ៉ូ ក្នុងមួយឆ្នាំចាប់ពីឆ្នាំ២០២៥ ដល់ឆ្នាំ២០៥០ ។ ចំនួនទឹកប្រាក់នេះ គឺប្រហែល ២០ភាគរយនៃអ្វី ដែលសហភាពអឺរ៉ុបបានចំណាយ លើការនាំចូលឥន្ធនៈហ្វូស៊ីលក្នុងឆ្នាំ២០២៣ ដែលជាលទ្ធផលនៃ ការសិក្សាដែលចេញ ផ្សាយដោយ Eurelectric បានបង្ហាញ។
ប្រភពពី Eurelectric ដែលជាសហព័ន្ធនៃឧស្សាហកម្មអគ្គិសនីអឺរ៉ុប តំណាងឱ្យឧបករណ៍ប្រើប្រាស់នៅអឺរ៉ុបជាង ៣,៥០០ ដែលសកម្មក្នុងការ ផលិតថាមពល ការចែកចាយ និងការផ្គត់ផ្គង់នៅទូទាំងទ្វីប។ នៅថ្ងៃបើកវេទិកា ដែលធ្វើឡើងនៅទី ក្រុងអាថែន សហព័ន្ធបានធ្វើបទបង្ហាញពីការសិក្សា “Grids for Speed” ដោយរៀបរាប់លម្អិតអំពីតម្រូវការវិនិយោគ សម្រាប់វិស័យនេះ។
បណ្តាញចែកចាយរបស់អ៊ឺរ៉ុប ចាំបាច់ត្រូវធ្វើទំនើបកម្ម ដើម្បីឱ្យអគ្គិសនីនៃការដឹកជញ្ជូន កំដៅ និងឧស្សាហ៍កម្ម និងរួមបញ្ចូលនូវថាមពលកកើតឡើងវិញ។ តាមរយៈការបង្កើនការវិនិយោគនៅក្នុងបណ្តាញ ប្រជាជនអឺរ៉ុប នឹងកាត់បន្ថយយ៉ាងខ្លាំង នូវការនាំចូលឥន្ធនៈហ្វូស៊ីល បង្កើតការងាររាប់លាន សន្សំសំចៃថាមពល និងបង្កើនល្បឿន កាត់បន្ថយកាបូន decarbonization នៃសេដ្ឋកិច្ចអឺរ៉ុប។
ប្រធាន Eurelectric លោក Leonhard Birnbaum បានឲ្យដឹងថា “សម្រាប់ការផ្លាស់ប្តូរថាមពលប្រកបដោយជោគជ័យ សហភាពអឺរ៉ុបត្រូវការបរិមាណដ៏ធំនៃសមត្ថភាពបណ្តាញបន្ថែម ការចំណាយនៃការមិនវិនិយោគ គឺកាន់តែខ្ពស់” ៕
ប្រែសម្រួល ឈូក បូរ៉ា
