បរទេស ៖ យោងតាមការចេញផ្សាយរបស់ RT មន្ទីរពេទ្យដែលលោក កំពុងទទួលការព្យាបាល នាយករដ្ឋមន្ត្រីស្លូវ៉ាគី បាននិយាយថា ស្ថានភាពរបស់នាយករដ្ឋមន្ត្រីស្លូវ៉ាគី Robert Fico បានប្រសើរឡើងវិញហើយ ហើយ គាត់កំពុងជាសះស្បើយ ពីរបួសដោយគ្រាប់កាំភ្លើង បន្ទាប់ពីការប៉ុនប៉ង ធ្វើឃាតកាលពីដើមខែនេះ ។
F.D. មន្ទីរពេទ្យសាកលវិទ្យាល័យ Roosevelt នៅ Banska Bystrica ប្រទេសស្លូវ៉ាគីបានចេញសេចក្តីថ្លែងការណ៍ខ្លីមួយស្តីពីស្ថានភាពរបស់ Fico កាលពីថ្ងៃសៅរ៍ថា បន្ទាប់ពីកិច្ចប្រជុំក្រុមប្រឹក្សាវេជ្ជសាស្ត្រថ្ងៃនេះ ក្រុមគ្រូពេទ្យដែលចូលរួមបានបញ្ជាក់ពីភាព ប្រសើរឡើង នៃស្ថានភាពសុខភាព របស់នាយករដ្ឋមន្ត្រី។
នាយករដ្ឋមន្ត្រី ត្រូវបានគេវាយប្រហារកាលពីថ្ងៃទី ១៥ ខែឧសភា បន្ទាប់ពីមានព្រឹត្តិការណ៍នយោបាយក្នុងទីក្រុង Handlova ដោយទទួលរងរបួសដោយគ្រាប់កាំភ្លើង ជាច្រើនគ្រាប់ ។
លោកFico ភ្លាមៗត្រូវបានបញ្ជូន ទៅមន្ទីរពេទ្យក្នុងស្ថានភាពគំរាមកំហែង ដល់អាយុជីវិត និងបានទទួលការវះកាត់សង្គ្រោះ បន្ទាន់រយៈពេលប្រាំម៉ោងហើយ គាត់បានសម្រាកព្យាបាល នៅមន្ទីរពេទ្យចាប់ តាំងពីមានការប៉ុនប៉ងធ្វើឃាតនោះមក ។
ជនប្រព្រឹត្តិសកម្មភាព ដែលត្រូវបានចាប់ខ្លួននៅកន្លែងកើតហេតុ ដែលក្រោយមកត្រូវបានគេកំណត់អត្តសញ្ញាណ ដោយប្រព័ន្ធផ្សព្វផ្សាយមានឈ្មោះថា Juraj Cintula អាយុ ៧១ ឆ្នាំ ជាអតីតសន្តិសុខ និងជាកវីនិពន្ធបោះពុម្ពផ្សាយ ។ លោកCintula ត្រូវបានគេរាយការណ៍ ថា បានកាន់កាប់ដោយស្របច្បាប់កាំភ្លើងដែលគាត់បានប្រើ ដោយសារតែការងារសន្តិសុខរបស់គាត់ ៕
ប្រែសម្រួល៖ស៊ុនលី
