បរទេស៖ មន្ទីរបញ្ចកោណបានប្រកាសកាលពីថ្ងៃសុក្រថា រដ្ឋមន្ត្រីក្រសួងការពារជាតិអាមេរិក លោក Lloyd Austin នឹងជួបសមភាគីចិន បន្ទាប់ពីទីក្រុងប៉េកាំងបានអនុវត្តល្បែងសង្គ្រាមជុំវិញកោះតៃវ៉ាន់ ជាសញ្ញាមួយដល់មេដឹកនាំថ្មីរបស់លទ្ធិប្រជាធិបតេយ្យដែលគាំទ្រដោយសហរដ្ឋអាមេរិក។
យោងតាមសារព័ត៌មាន VOA ចេញផ្សាយនៅថ្ងៃទី២៥ ខែឧសភា ឆ្នាំ២០២៤ បានឱ្យដឹងថា មន្ទីរបញ្ចកោណបាននិយាយថា លោក Austin នឹងជួបជាមួយឧត្តមនាវីឯកចិន Dong Jun នៅពេលដែលពួកគេចូលរួមក្នុងកិច្ចសន្ទនា Shangri-La ថ្ងៃទី ៣១ ខែឧសភាដល់ថ្ងៃទី ២ ខែមិថុនា ដែលជាការប្រមូលផ្តុំប្រចាំឆ្នាំរបស់មន្ត្រីការពារជាតិជុំវិញពិភពលោក។
ប្រទេសចិនក្នុងសប្តាហ៍នេះ បានឡោមព័ទ្ធកោះតៃវ៉ាន់ជាមួយនឹងនាវាចម្បាំង និងយន្តហោះចម្បាំងនៅក្នុងការសាកល្បងសមត្ថភាពរបស់ខ្លួនក្នុងការដណ្តើមយកកោះនេះ ដែលចិនបានអះអាងថា។ សមយុទ្ធនេះបានធ្វើឡើងបន្ទាប់ពីការចូលកាន់តំណែងរបស់លោកប្រធានាធិបតីកោះតៃវ៉ាន់លោក Lai Ching-te ដែលបានប្តេជ្ញាការពារលទ្ធិប្រជាធិបតេយ្យដែលគ្រប់គ្រងដោយខ្លួនឯងមួយនេះ។
កិច្ចប្រជុំរបស់ លោក Austin ជាមួយលោក Dong ត្រូវបានគេរំពឹងទុកយ៉ាងទូលំទូលាយចាប់តាំងពីពួកគេបាននិយាយគ្នាតាមទូរស័ព្ទក្នុងខែមេសា ដែលជាកិច្ចពិភាក្សាដ៏សំខាន់លើកដំបូងរវាងប្រមុខការពារជាតិនៃមហាអំណាចទាំងពីរក្នុងរយៈពេលជិត ១៨ ខែ៕
រដ្ឋបាលរបស់ប្រធានាធិបតី Joe Biden និងប្រទេសចិនបាននិងកំពុងបង្កើនទំនាក់ទំនងដើម្បីបន្ធូរបន្ថយការកកិតដោយរដ្ឋមន្ត្រីការបរទេស Antony Blinken បានធ្វើទស្សនកិច្ចនៅទីក្រុងប៉េកាំង និងសៀងហៃកាលពីខែមុន។ ប្រែសម្រួលៈ ណៃ តុលា
