បរទេស៖ សារព័ត៌មាន Australian Broadcasting Corp បានដកស្រង់សម្តីមន្ត្រី អង្គការសហប្រជាជាតិ បានកាលពីថ្ងៃអាទិត្យថា មនុស្សជាង ៦៧០នាក់ ត្រូវបានគេភ័យខ្លាចថា បានស្លាប់នៅក្នុងការរអិល បាក់ដីនៅប៉ាពួញូហ្គីណេ ។
គ្រោះមហន្តរាយនេះបានកើតឡើងនៅក្នុងខេត្ត Enga ដាច់ស្រយាលនៅតំបន់ខ្ពង់រាប របស់ប្រទេសកាលពីថ្ងៃសុក្រ ដោយប្រព័ន្ធផ្សព្វផ្សាយ ក្នុងស្រុកបានប៉ាន់ប្រមាណជាបឋមថា ចំនួនអ្នកស្លាប់ប្រហែល ៣០០នាក់ បន្ទាប់ពីផ្ទះ និងអគារជាច្រើនត្រូវបានកប់នៅក្រោមគំនរបាក់បែកជាច្រើនម៉ែត្រ។
ទោះជាយ៉ាងណាក៏ដោយ ទំហំ នៃផលប៉ះពាល់គឺធំជាងការគិតដំបូង នេះបើយោងតាមប្រធានបេសកកម្មរបស់អង្គការអន្តរជាតិ សម្រាប់ការធ្វើចំណាកស្រុកនៅ ប្រទេសប៉ាពួញូហ្គីណេ លោក Serhan Aktoprak ដែលបានប៉ាន់ប្រមាណចំនួនអ្នកស្លាប់លើសពី ៦៧០នាក់កាលពីថ្ងៃអាទិត្យ ជាមួយនឹងផ្ទះជាង ១៥០ខ្នង។
កិច្ចខិតខំប្រឹងប្រែងជួយសង្គ្រោះ ដែលកំពុងបន្តត្រូវបានរារាំងដោយស្ថានភាពលំបាក ដោយដីជុំវិញតំបន់គ្រោះមហន្តរាយនៅតែមានគ្រោះថ្នាក់ និងមិនមានស្ថេរភាព។ មកទល់ពេលនេះ មានតែសាកសពចំនួន ៥នាក់ប៉ុណ្ណោះ ត្រូវបានគេរកឃើញ។
ប្រតិបត្តិការជួយសង្គ្រោះមានភាពស្មុគស្មាញបន្ថែមទៀតដោយ សង្រ្គាមកុលសម្ព័ន្ធជាមួយនឹងក្តីបារម្ភអំពីសុវត្ថិភាពនៃក្បួនជំនួយ។ អំពើហឹង្សាបែបនេះនៅក្នុងខេត្ត Enga បានឆក់យកជីវិតមនុស្ស រាប់សិបនាក់រួចមកហើយក្នុងឆ្នាំនេះ៕
ប្រែសម្រួល ឈូក បូរ៉ា
