វ៉ាស៊ីនតោន៖ អតីតប្រធានាធិបតីអាមេរិកលោក ដូណាល់ ត្រាំ កាលពីថ្ងៃព្រហស្បតិ៍ត្រូវបានគេរកឃើញថា មានពិរុទ្ធលើការចោទប្រកាន់ ទាក់ទងនឹងការបិទបាំងប្រាក់ ដែលបានបង់ជំនួសលោកឱ្យ តារាអាសអាភាសមុនការបោះឆ្នោតឆ្នាំ២០១៦ ដែលធ្វើឱ្យលោកក្លាយជា អតីតប្រធានាធិបតីអាមេរិកដំបូងគេ ដែលត្រូវបានកាត់ទោស ក្នុងសំណុំរឿងព្រហ្មទណ្ឌ។
បុរសអាយុ ៧៧ឆ្នាំដែលនឹងត្រូវតែងតាំងជា បេក្ខជនប្រធានាធិបតីនៃសាធារណរដ្ឋ សម្រាប់ការបោះឆ្នោតថ្ងៃទី៥ ខែវិច្ឆិកានៅឯសន្និបាតជាតិរបស់ គណបក្សនៅក្នុងខែកក្កដានោះ ត្រូវបានគេរកឃើញថា មានពិរុទ្ធលើបទឧក្រិដ្ឋទាំង ៣៤ នៃការក្លែងបន្លំកំណត់ត្រាអាជីវកម្មនៅក្នុងការ កាត់ក្តីនៅតុលាការក្នុងទីក្រុងញូវយ៉ក។
គណៈវិនិច្ឆ័យបានឈានដល់ សាលក្រមតាមរយៈកិច្ចពិភាក្សាបិទទ្វារពីរថ្ងៃ បន្ទាប់ពីសវនាការជាច្រើនសប្តាហ៍ នៅក្នុងសំណុំរឿងដំបូងក្នុងចំណោម ៤ករណី ដែលអតីតប្រធានាធិបតីអាមេរិករូបនេះ ត្រូវបានចោទប្រកាន់។
លោក ត្រាំ បានប្រាប់អ្នកយកព័ត៌មាន នៅឯតុលាការបន្ទាប់ពីសាលក្រមថា “នេះគឺជាការកាត់ក្តីដ៏តឹងរ៉ឹងដោយចៅក្រម ដែលមានជម្លោះដែលពុករលួយ” ។ លោកបានបញ្ជាក់ថា ការចោទប្រកាន់ទាំងអស់មកលើរូបលោកគឺគ្មានមូលដ្ឋាន។
លោកបានថ្លែងថា “សាលក្រមពិតនឹងធ្វើឡើងនៅថ្ងៃទី៥ ខែវិច្ឆិកាដោយប្រជាជន ដោយសំដៅទៅលើការ បោះឆ្នោតនាពេលខាងមុខ ដោយបន្ថែមថា យើងមិនបានធ្វើខុសនោះទេ ខ្ញុំជាមនុស្សស្លូតត្រង់ណាស់” ៕
ប្រែសម្រួល ឈូក បូរ៉ា
