ព្យុងយ៉ាង៖ ទីភ្នាក់ងារសារព័ត៌មានកណ្តាលកូរ៉េ បានរាយការណ៍នៅថ្ងៃសុក្រនេះថា មេដឹកនាំកូរ៉េខាងជើង លោក គីម ជុងអ៊ុន បានបញ្ជា និងដឹកនាំការធ្វើសមយុទ្ធ បង្ហាញពីការបាញ់គ្រាប់រ៉ុក្កែត ដ៏ធំអស្ចារ្យ សំដៅទៅកាន់ប្រទេសកូរ៉េខាងត្បូង។
របាយការណ៍ស្តីពីសមយុទ្ធនេះបានធ្វើឡើង បន្ទាប់ពីមានការបាញ់បង្ហោះដោយកូរ៉េខាងជើង នូវកាំជ្រួចមីស៊ីលរយៈចម្ងាយខ្លីជាង ១០គ្រាប់ ឆ្ពោះទៅសមុទ្រជប៉ុនកាលពីថ្ងៃព្រហស្បតិ៍ ត្រឹមតែប៉ុន្មានថ្ងៃបន្ទាប់ពីការ បាញ់បង្ហោះផ្កាយរណបយោធា មិនជោគជ័យដោយទីក្រុងព្យុងយ៉ាង។
ប្រភពពី KCNA មិនបានលើកឡើងថាពេលណា “ការបាញ់បង្ហាញថាមពល” ដោយក្រុមរងគ្រាប់រ៉ុក្កែតធំៗបានកើតឡើងនោះទេ។ ក្រុងព្យុងយ៉ាងអះអាងថា គ្រាប់រ៉ុក្កែតធំទំនើបរបស់ខ្លួនមានសមត្ថភាពផ្ទុកក្បាល គ្រាប់នុយក្លេអ៊ែរយុទ្ធសាស្ត្រ។
យោងតាមរបាយការណ៍របស់ KCNA ពួកគេបានវាយប្រហារលើគោលដៅកោះមួយ ដែលមានចម្ងាយ ៣៦៥ គីឡូម៉ែត្រ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានក្យូដូជប៉ុន។
ទីភ្នាក់ងារសារព័ត៌មានបានបន្ថែមថា សមយុទ្ធនេះមានគោលបំណងបង្ហាញថា ប្រទេសកូរ៉េខាងជើង នឹងមិន “ស្ទាក់ស្ទើរក្នុងការអនុវត្តការវាយប្រហារទុកជាមុន ដោយអំពាវនាវឱ្យមានសិទ្ធិការពារខ្លួន” ៕
ប្រែសម្រួល ឈូក បូរ៉ា
