ប៉េកាំង៖ អ្នកវិភាគនយោបាយ ជនជាតិក្រូអាតព្រមានថា អត្រាពន្ធខ្ពស់ របស់សហភាពអឺរ៉ុប លើរថយន្តអគ្គិសនីរបស់ចិន (EVs) អាចជះឥទ្ធិពលអវិជ្ជមាន ដល់ការអភិវឌ្ឍន៍រយៈពេលវែង នៃឧស្សាហកម្មរថយន្តអឺរ៉ុប ។
នៅក្នុងបទសម្ភាសន៍ថ្មីៗនេះជាមួយស៊ីនហួ លោក Kresimir Macan បានឲ្យដឹងថា ឥទ្ធិពលរបស់សហរដ្ឋអាមេរិក លើពន្ធគយរបស់សហភាពអឺរ៉ុប សម្រាប់រថយន្ត EV របស់ចិននឹងមិនផ្តល់ផលប្រយោជន៍ ដល់សេដ្ឋកិច្ចអឺរ៉ុបនោះទេ។
លោកបានកត់សម្គាល់ថា ពន្ធដែលបានបង្ហាញជាប្រវត្តិសាស្ត្រថាមាន “គ្រោះថ្នាក់” ដល់សេដ្ឋកិច្ចពិភពលោកនឹង បន្តជះឥទ្ធិពលអវិជ្ជមានដល់ឧស្សាហកម្មរថយន្តអគ្គិសនី នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
កាលពីថ្ងៃទី១៤ ខែឧសភា ប្រធានាធិបតីសហរដ្ឋអាមេរិកលោក ចូ បៃដិន បានប្រកាសពន្ធថ្មីលើទំនិញ នាំចូលពីប្រទេសចិន រួមទាំងរថយន្ត EV បន្ថែមលើពន្ធ ដែលមានស្រាប់នៅក្រោមផ្នែកទី៣០១ ។ ពន្ធបន្ថែមនឹងដំឡើងពន្ធ លើការនាំចូលរថយន្ត EV របស់ចិនដល់ ១០០ភាគរយនៅឆ្នាំនេះ។
កាលពីខែតុលាឆ្នាំមុន គណៈកម្មការអឺរ៉ុប បានចាប់ផ្តើមការស៊ើបអង្កេតប្រឆាំង នឹងការឧបត្ថម្ភធនលើការ នាំចូលរថយន្ត EV ពីប្រទេសចិន ហើយត្រូវបានកំណត់ថាតើពន្ធដារ គួរតែត្រូវបានដាក់ដើម្បីការពារក្រុមហ៊ុនផលិតរបស់សហភាពអឺរ៉ុប ពីដៃគូប្រកួតប្រជែងរបស់ចិនដែរឬទេ៕
ប្រែសម្រួល ឈូក បូរ៉ា
