បរទេស៖ យន្តហោះពីរគ្រឿងបានបុកគ្នា នៅកណ្តាលអាកាសអំឡុង ពេលព្រឹត្តិការណ៍សម្តែងរបស់យន្តហោះ Beja Air Show នៅភាគខាងត្បូងប្រទេសព័រទុយហ្គាល់ កាលពីថ្ងៃអាទិត្យ ដែលបណ្តាលឱ្យអ្នកបើកយន្តហោះម្នាក់ស្លាប់ និងម្នាក់ទៀតរងរបួស។
យោងតាមសារព័ត៌មាន RT ចេញផ្សាយ នៅថ្ងៃទី៣ ខែមិថុនា ឆ្នាំ២០២៤ បានឱ្យដឹងថា ឧបទ្ទវហេតុដ៏គ្រោះថ្នាក់នេះ បានកើតឡើងក្នុងអំឡុងពេលបង្ហាញក្នុងព្រឹត្តិការណ៍ដោយក្រុម Yaksars ដែលជាក្រុមអាកាសចរព័រទុយហ្គាល់-អេស្បាញ ដែលហោះហើរយន្តហោះ Yakovlev Yak-52 ដែលជាយន្តហោះហ្វឹកហាត់ពីសម័យសូវៀត។ វីដេអូជាច្រើននៃការធ្លាក់នេះ ត្រូវបានថតដោយអ្នកទស្សនាដែលបានប្រមូលផ្តុំគ្នាដើម្បីមើលកម្មវិធី។
វីដេអូពីកន្លែងកើតហេតុបង្ហាញពីយន្តហោះ Yak-52 ចំនួន៦គ្រឿងកំពុងហោះហើរក្នុងទម្រង់ជាគ្រាប់ពេជ្រយ៉ាងតឹងរ៉ឹង ដោយយន្តហោះមួយគ្រឿងក្នុង ចំណោមយន្តហោះទាំងនោះបានធ្លាក់ចេញពីក្រុម និងនៅខាងក្រោយ។ យន្តហោះដែលទំនងជាបញ្ចេញផ្សែងចេញពី ម៉ាស៊ីនរបស់វាបានឡើងភ្លាមៗ ហើយបុកយន្តហោះមួយគ្រឿងទៀត។
យន្តហោះដែលសន្មត់ថាដំណើរការខុសប្រក្រតី បន្ទាប់មកបានធ្លាក់ និងបានផ្ទុះ និងសម្លាប់អ្នកបើកបរ។
វីដេអូមួយទៀតបង្ហាញឱ្យឃើញថា យន្តហោះដែលបានបុកចំកណ្តាលអាកាស បានធ្វើការចុះចតជាបន្ទាន់នៅលើផ្លូវរត់ ប៉ុន្តែបានរអិលនៅពេលឈប់។ តាមសេចក្តីរាយការណ៍, ឡុតរបស់យន្តហោះនោះ បានរងរបួសធ្ងន់ធ្ងរ ដែលមិនបានបញ្ជាក់ច្បាស់លាស់។
កងទ័ពអាកាសព័រទុយហ្គាល់បានទទួល ស្គាល់ឧបទ្ទវហេតុនេះ ដោយបង្ហាញថា អ្នកបើកយន្តហោះដែលបាន ស្លាប់គឺជាជនជាតិអេស្ប៉ាញ។ បន្ទាប់ពីការធ្លាក់នោះ ព្រឹត្តិការណ៍សម្តែងរបស់យន្តហោះ ត្រូវបានបញ្ចប់មុនកាលកំណត់ ហើយអ្នកទស្សនាទាំងអស់បានជម្លៀសចេញដោយសុវត្ថិភាពពីកន្លែងនោះ៕
ប្រែសម្រួល: ណៃ តុលា
