បរទេស៖ ប្រព័ន្ធផ្សព្វផ្សាយអ៊ីរ៉ង់ បានចោទអ៊ីស្រាអែលថា បានវាយប្រហារនៅក្នុងប្រទេស ស៊ីរីដោយបានសម្លាប់មនុស្ស ១៦ នាក់រួមទាំងទីប្រឹក្សាមកពីកងឆ្មាំបដិវត្តន៍ អ៊ីស្លាមរបស់ប្រទេសអ៊ីរ៉ង់ផងដែរ។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៤ ខែមិថុនា ឆ្នាំ២០២៤ បានឱ្យដឹងថា ទីភ្នាក់ងារសារព័ត៌មាន Tasnim របស់អ៊ីរ៉ង់បានរាយការណ៍ កាលពីថ្ងៃសុក្រថា លោក “Saeed Abyar ដែលជាទីប្រឹក្សាម្នាក់ នៃកងឆ្មាំបដិវត្តន៍ អ៊ីស្លាមអ៊ីរ៉ង់ (IRGC) នៅក្នុងប្រទេសស៊ីរី ត្រូវបានស្លាប់នៅក្នុងការវាយឆ្មក់របស់អ៊ីស្រាអែល លើទីក្រុង អាឡិបប៉ូ នៅយប់ថ្ងៃទី ២ ខែមិថុនា” ប៉ុន្តែមិនបានបញ្ជាក់តួនាទីរបស់ Abyar ទេ។
សេចក្តីប្រកាសមួយ របស់ក្រសួងការពារជាតិ ស៊ីរីបាននិយាយថា អ៊ីស្រាអែល បានបើកការវាយប្រហារ ពីភាគអាគ្នេយ៍នៃទីក្រុង អាឡិបប៉ូ ដោយផ្តោតលើ ទីតាំងមួយចំនួននៅជិត ទីក្រុងនេះភ្លាមៗបន្ទាប់ពីពាក់កណ្តាលអធ្រាត្រ។ ហេតុការណ៍នេះបានបណ្តាល ឲ្យមានមនុស្សស្លាប់ និងខូចខាតសម្ភារៈមួយចំនួន ។
យោងតាមអង្គការឃ្លាំមើល សិទ្ធិមនុស្សស៊ីរី ដែលមានមូលដ្ឋាន នៅចក្រភពអង់គ្លេស (SOHR), អ៊ីស្រាអែលបានវាយឆ្មក់ រោងចក្រមួយនៅ Hayyan ភាគពាយព្យនៃទីក្រុង អាឡិបប៉ូ ដោយបានសម្លាប់សមាជិក ១៦ នាក់នៃក្រុមគាំទ្រអ៊ីរ៉ង់។ ក្រុមនេះរួមមានយុទ្ធជនស៊ីរី និងបរទេស។
អ៊ីស្រាអែលមិនបានធ្វើអត្ថាធិប្បាយលើព័ត៌មាននេះទេ។ ប្រទេសនេះកម្រនិយាយចេញអំពីការវាយឆ្មក់នៅក្នុងប្រទេសស៊ីរី ប៉ុន្តែបានប្រកាសម្តងហើយម្តងទៀតថា ខ្លួននឹងមិនអនុញ្ញាតឱ្យ “សត្រូវ” អ៊ីរ៉ង់ បង្កើនវត្តមានរបស់ខ្លួននៅក្នុងប្រទេសនោះទេ។
ស្ថានកុងស៊ុលនៅខាងក្នុង ស្ថានទូតអ៊ីរ៉ង់ក្នុងប្រទេសស៊ីរីត្រូវបានវាយប្រហារនៅថ្ងៃទី ១ ខែមេសា ដោយបានសម្លាប់មនុស្ស ១៣ នាក់ ក្នុងនោះមាន សមាជិក IRGC ៧ នាក់។ អ៊ីរ៉ង់បានចោទអ៊ីស្រាអែលថា ជាអ្នកនៅពីក្រោយខ្លួន ប៉ុន្តែទីក្រុង Tel Aviv មិនបានអះអាងទទួលខុសត្រូវទេ៕
ប្រែសម្រួលៈ ណៃ តុលា
