អង់ការ៉ា៖ ប៉ូលិសតួកគី បានឃុំខ្លួនជនសង្ស័យចំនួន ៧២នាក់ ក្នុងការវាយឆ្មក់ ទូទាំងប្រទេសក្នុងរយៈពេល ៤ថ្ងៃចុងក្រោយនេះ សម្រាប់ការចោទប្រកាន់ ពាក់ព័ន្ធនឹងការប៉ុនប៉ង ធ្វើរដ្ឋប្រហារក្នុងឆ្នាំ២០១៦ នេះបើតាមរដ្ឋមន្ត្រីមហាផ្ទៃ លោក Ali Yerlikaya។
លោក Yerlikaya បានឲ្យដឹងថា ជនសង្ស័យត្រូវបានចោទ ប្រកាន់ពីបទមានទំនាក់ទំនងជាមួយចលនា Gulen ដែលទីក្រុងអង់ការ៉ា បានស្តីបន្ទោស ចំពោះការប៉ុនប៉ងធ្វើរដ្ឋប្រហារ បរាជ័យកាលពីថ្ងៃទី១៥ ខែកក្កដា ឆ្នាំ២០១៦។
រដ្ឋមន្ត្រីតួកគីដែលបានបង្ហោះ នៅលើប្រព័ន្ធផ្សព្វផ្សាយសង្គម X បានឲ្យដឹងថា ប៉ូលីសបានធ្វើការវាយឆ្មក់ នៅក្នុងប្រតិបត្តិការមួយ ដែលមានឈ្មោះថា “Kiskac (Pinch)-19” នៅទូទាំង ១៧ខេត្ត ហើយបានរឹបអូសសម្ភារៈឌីជីថល និងឯកសាររបស់អង្គការ ដោយមិនផ្តល់ព័ត៌មានលម្អិតអំពី ពេលវេលាប្រតិបត្តិការនលះទេ។
អ្នកជាប់ឃុំត្រូវ បានគេសង្ស័យថា មានជាប់ពាក់ព័ន្ធនៅក្នុង “រចនាសម្ព័ន្ធប៉ូលីស រចនាសម្ព័ន្ធយោធា និងរចនាសម្ព័ន្ធ បច្ចុប្បន្ន” របស់ចលនា Gulen ដោយលោក បានបន្ថែមថា នេះឆ្លុះបញ្ចាំងពីការអះអាង របស់រដ្ឋាភិបាលតួកគី ជាយូរមកហើយអំពីការជ្រៀត ចូលរបស់ចលនា Gulen នៅក្នុងប្រព័ន្ធតុលាការ និងការអនុវត្តច្បាប់។
បើតាមលោករដ្ឋមន្ត្រី បានឲ្យដឹងថា ជនសង្ស័យ បានទាក់ទងគ្នាតាមរយៈទូរស័ព្ទបង់ប្រាក់ និងកំពុងទាក់ទងជាមួយ សមាជិកក្រុម ដែលទទួលខុសត្រូវ ៕
ប្រែសម្រួល ឈូក បូរ៉ា
