តូក្យូ៖ នាយករដ្ឋមន្ត្រីជប៉ុនលោក ហ្វូមីអូ គីស៊ីដា កាលពីថ្ងៃសុក្រ បានបញ្ជាឱ្យរដ្ឋមន្ត្រីមួយ បង្កើតច្បាប់មួយ ដើម្បីបង្កើនសមត្ថភាព “ការពារតាមអ៊ីនធឺណិតសកម្ម” របស់ប្រទេសជប៉ុន ដើម្បីទប់ស្កាត់ ការវាយប្រហារតាមអ៊ីនធឺណិត ប្រឆាំងនឹងប្រទេស ដោយការត្រួតពិនិត្យសញ្ញា ព្រមានជាមុន។
លោក គីស៊ីដា បានឲ្យដឹងនៅក្នុងកិច្ចប្រជុំលើកដំបូង នៃក្រុមរដ្ឋាភិបាល ដែលមានការចូលរួម ពីអ្នកជំនាញក្នុងវិស័យនេះថា “វាគឺជាកិច្ចការបន្ទាន់ដែលកាន់តែខ្លាំងឡើង ក្នុងការពង្រឹងសមត្ថភាព របស់ប្រទេសជប៉ុន ក្នុងការដោះស្រាយជាមួយនឹងការវាយប្រហារ តាមអ៊ីនធឺណិត ដោយគិតពីបរិយាកាសសន្តិសុខ នាពេលបច្ចុប្បន្ន” ។
ខណៈដែលរដ្ឋាភិបាលមានគោលបំណង បញ្ជូនសេចក្តីព្រាងច្បាប់នេះ ទៅសភាឱ្យបានឆាប់ ដូចសម័យប្រជុំវិសាមញ្ញ ក្នុងរដូវស្លឹកឈើជ្រុះ រដ្ឋមន្ត្រីឌីជីថលលោក Taro Kono ដែលបានចូលរួមក្នុងការជួបជុំនោះ បានស្នើសុំឱ្យសមាជិកក្រុមប្រឹក្សា រាយការណ៍ ពីការរកឃើញរបស់ពួកគេ ក្នុងរយៈពេលពីរទៅបីខែ។
ការការពារតាមអ៊ីនធឺណិត សកម្ម គឺជាវិធីសាស្រ្តមួយ ដើម្បីសង្កេត និងរកឃើញសញ្ញានៃការវាយប្រហារតាមអ៊ីនធឺណិត ហើយប្រសិនបើចាំបាច់ រំខានដល់ម៉ាស៊ីនមេសត្រូវជាមួយនឹង មេរោគកុំព្យូទ័រដើម្បីបន្សាបពួកវា។ ទោះយ៉ាងណាក៏ដោយ មានការព្រួយបារម្ភថា វិធីសាស្រ្តនេះអាចបំពាន លើការធានាដោយរដ្ឋធម្មនុញ្ញ នៃការសម្ងាត់ទំនាក់ទំនង។
នៅក្នុងកិច្ចប្រជុំក្រុមនេះ ដែលរួមមានអ្នកជំនាញចំនួន ១៧នាក់ ដូចជាអ្នកឯកទេសផ្នែកសន្តិសុខតាមអ៊ីនធឺណិត និងមេធាវី លោក Kono បានឲ្យដឹងថា វាចាំបាច់ដើម្បីសម្រេចបាន នូវប្រព័ន្ធមួយដែលអាចប្រៀបធៀបទៅនឹង សហរដ្ឋអាមេរិក និងប្រជាជាតិអឺរ៉ុប ខណៈពេលដែលការពារសិទ្ធិ និងផលប្រយោជន៍ របស់ប្រជាជន៕
ប្រែសម្រួល ឈូក បូរ៉ា
