គៀវ៖ សាលាសេដ្ឋកិច្ចទីក្រុងគៀវ (KSE) បានឲ្យដឹងនៅក្នុងរបាយការណ៍មួយថា វិស័យថាមពលរបស់ប្រទេសអ៊ុយក្រែន បានរងការខូចខាត និងការខាតបង់ចំនួន ៥៦,២ពាន់លានដុល្លារអាមេរិក ដោយសារតែជម្លោះរុស្ស៊ី និងអ៊ុយក្រែន។
របាយការណ៍បានឲ្យដឹងថា គិតត្រឹមខែឧសភា ឆ្នាំ២០២៤ ការខូចខាតដោយផ្ទាល់ដល់វិស័យថាមពលរបស់អ៊ុយក្រែន មានចំនួន ១៦,១ពាន់លានដុល្លារដោយសារតែការបំផ្លិចបំផ្លាញនៃឧបករណ៍ផលិតអគ្គិសនី កន្លែងបញ្ជូន និងហេដ្ឋារចនាសម្ព័ន្ធប្រេង និងឧស្ម័ន។
KSE បានប៉ាន់ប្រមាណការខាតបង់ នៃវិស័យថាមពលប្រហែល ៤០,១ពាន់លានដុល្លារ ដែលភាគច្រើនកើតចេញ ពីប្រាក់ចំណូលរបស់ក្រុមហ៊ុន ថាមពលដែលបាត់បង់។
យោងតាមរបាយការណ៍ ឧស្សាហកម្មថាមពលអគ្គិសនី បានរងការវាយប្រហារ ខ្លាំងបំផុតនៅក្នុងអរិភាព ដែលបណ្តាលឱ្យខូចខាត ១១,៤ពាន់លានដុល្លារ និងខាតបង់ ១៨,៣ពាន់លានដុល្លារ។
វិស័យប្រេង និងឧស្ម័ន ក៏ទទួលបានការខូចខាត យ៉ាងសន្ធឹកសន្ធាប់ផងដែរ ដែលត្រូវបានប៉ាន់ប្រមាណថា មានការខូចខាតចំនួន ៣,៣ពាន់លានដុល្លារ និងការខាតបង់ចំនួន ១៨,៤ ពាន់លានដុល្លារ៕
ប្រែសម្រួល ឈូក បូរ៉ា
