បរទេស៖ យោងតាមការចេញផ្សាយរបស់ RT ឧត្តមសេនីយ៍ Wieslaw Kukula ប្រធានអគ្គសេនាធិការនៃ កងទ័ពប៉ូឡូញបាននិយាយថា កងទ័ពប៉ូឡូញដែលដាក់ពង្រាយ នៅតាមព្រំដែនជាមួយប្រទេសបេឡារុស្ស នឹងត្រូវបានបំពាក់បំពាន់ឱ្យកាន់តែប្រសើរឡើង និងស្នាក់នៅរយៈពេលវែងខាងមុខនេះ។
រដ្ឋាភិបាលទីក្រុង Warsaw បានបញ្ជូនទាហានប្រចាំការរាប់ពាន់នាក់ ទៅពង្រឹងឆ្មាំព្រំដែនកាលពីរដូវក្តៅមុន ដោយលើកឡើងពីវត្តមានរបស់បុគ្គលិក Wagner Group នៅក្នុងប្រទេសបេឡារុស្ស ហើយបានចោទប្រកាន់ទីក្រុងមូស្គូ និងទីក្រុងMinskថាកំពុងរៀបចំឲ្យមានសង្គ្រាមកូនកាត់។
ប្រទេសប៉ូឡូញបានអះអាងថា លំហូរជនចំណាកស្រុកមកពីទ្វីបអាហ្រ្វិក និងអាស៊ីតាមរយៈប្រទេសបេឡារុស គឺជាផ្នែកមួយនៃផែនការរបស់រុស្ស៊ី និងបេឡារុស្ស ដើម្បីធ្វើអស្ថិរភាពសហភាពអឺរ៉ុប និងរដ្ឋសមាជិកណាតូ។
ជាងនេះទៅទៀត លោក Kukula បានអះអាងថា កងទ័ពនៅតាមព្រំដែនត្រូវតែមានអាវុធពេញលេញ ពីព្រោះ ស្ថានភាពអាចនឹងកើតឡើង នៅពេលដែលអាវុធនឹងត្រូវបានប្រើប្រឆាំងនឹង យើងអាចផ្ទុះឡើងហើយទោះបីជាយ៉ាងណាក៏ដោយ លោកបាននិយាយថា ប្រទេសប៉ូឡូញកំពុងរក្សា ការអត់ធ្មត់តានតឹងមួយ ដើម្បីកុំឱ្យប្រទេសបេឡារុស្ស ឬរុស្សីមានលេសធ្វើឱ្យមានសង្គ្រាមផ្ទុះឡើង ៕
ប្រែសម្រួល៖ ស៊ុន លី
