បរទេស៖ ក្រុមអ្នកតវ៉ាបានស្នើឱ្យកងទ័ពចេញមុខប្រឆាំងទៅនឹងអ្វីដែលពួកគេហៅថា ជាសំណើសុំនៅក្រៅឃុំ ដែលគេរំពឹងថា នឹងស្វែងរកដោយអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា នៅពេលគាត់រាយការណ៍ទៅព្រះរាជអាជ្ញាដើម្បីទទួលស្គាល់ការចោទប្រកាន់ពីបទប្រមាថព្រះមហាក្សត្រ និងបទឧក្រិដ្ឋកម្មកុំព្យូទ័រនៅសប្តាហ៍ក្រោយ។
យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយនៅថ្ងៃទី១២ ខែមិថុនា ឆ្នាំ២០២៤ បានឱ្យដឹងថា ក្រុមបាតុករមកពីបណ្តាញនិស្សិត និងប្រជាជនកំណែទម្រង់ប្រទេសថៃ និងប្រជាជនថៃ ក្រុមការពាររាជានិយម បានដើរដង្ហែទៅកាន់ទីបញ្ជាការកងទ័ព កាលពីថ្ងៃអង្គារ ជាកន្លែងដែលពួកគេបានដាក់ញត្តិ។
ក្រុមទាំងនោះបានជំរុញឱ្យកងទ័ពប្រឆាំងនឹងការធានានៅក្រៅឃុំដែលលោកថាក់ស៊ីន ទំនងជានឹងស្នើសុំនៅពេលគាត់ជួបព្រះរាជអាជ្ញាដើម្បីទទួលស្គាល់ជាផ្លូវការនូវការចោទប្រកាន់របស់គាត់លើការចោទប្រកាន់ពីបទរំលោភលើមាត្រា១១២ នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្រនៅថ្ងៃទី ១៨ ខែមិថុនាខាងមុខ។
ការចោទប្រកាន់នេះត្រូវបានដាក់ប្រឆាំងនឹងលោក ថាក់ស៊ីន បន្ទាប់ពីបទសម្ភាសន៍ដែលលោកបានផ្តល់ឱ្យកាសែតកូរ៉េខាងត្បូងមួយនៅក្នុងឆ្នាំ២០១៥ ទាក់ទងនឹងរដ្ឋប្រហារក្រុមប្រឹក្សាជាតិដើម្បីសន្តិភាពនិងសណ្តាប់ធ្នាប់ (NCPO) ដែលបានបញ្ចប់ការគ្រប់គ្រងអំណាចរបស់លោកស្រីយីង ឡាក់ស៊ីណាវ៉ាត្រា កាលពីថ្ងៃទី២២ ខែឧសភា ឆ្នាំ២០១៤ ។
ការអត្ថាធិប្បាយរបស់លោកត្រូវបានគេចោទថាមានការរិះគន់និងប្រមាថអំពីរបបរាជានិយម។ យ៉ាងណាក៏ដោយ លោកថាក់ស៊ីន បានបដិសេធការចោទប្រកាន់នេះដោយនិយាយថា ខ្លឹមសារនៃបទសម្ភាសន៍របស់គាត់ត្រូវបានបំភ្លៃដើម្បីធ្វើអោយគាត់មានបញ្ហា៕ ប្រែសម្រួលៈ ណៃ តុលា
