បរទេស៖យោងតាមការចេញផ្សាយរបស់ RT កងកម្លាំងការពារព្រំដែននៃប្រទេសអ៊ុយក្រែនបាននិយាយកាលពីថ្ងៃសៅរ៍ថា ឆ្មាំព្រំដែនអ៊ុយក្រែនបានងាកទៅប្រើអាវុធរបស់ពួកគេដើម្បីបញ្ឈប់ប្រជាជនពីការភៀសខ្លួនចេញពីប្រទេស។
សេចក្តីថ្លែងការណ៍ដែលបានបង្ហោះនៅលើ Facebook បាននិយាយថា ការល្បាតនៅក្នុងតំបន់ Transcarpathia ភាគខាងលិចនៃប្រទេសអ៊ុយក្រែនត្រូវបាញ់ព្រមានជាច្រើនដង ខណៈពេលដែលកំពុងដេញតាមក្រុមដែលប៉ុនប៉ងឆ្លងដែនខុសច្បាប់ចូលទៅក្នុងប្រទេសហុងគ្រី។
ប្រភពដដែលបាននិយាយទៀតថា ឆ្មាំព្រំដែនបានឃុំខ្លួនមនុស្សសរុបចំនួន៩ នាក់ដែលភៀសខ្លួនចេញពីប្រទេសអ៊ុយក្រែនតាមរយៈ Transcarpathia ក្នុងរយៈពេលត្រឹមតែមួយថ្ងៃប៉ុណ្ណោះហើយក្រុមទី១រួមទាំងអ្នកស្រុកគៀវបីនាក់បានព្យាយាមឆ្លងកាត់ព្រំដែននៅពេលយប់ដោយប្រើផែនទីតាមអ៊ីនធឺណិត។
ក្រុមទី១ត្រូវបានបន្តបន្ទាប់តាមដោយក្រុមមួយទៀតដែលមានអ្នកស្រុក Transcarpathia បួននាក់ផងហើយ អាជ្ញាធរបាននិយាយថា បុរសទាំងនោះបានទាក់ទងនឹងអ្នកជួញដូរ ហើយបានបង់ប្រាក់ម្នាក់ៗ ៥៥០០ ដុល្លារសម្រាប់ការឆ្លងកាត់ព្រំដែនដោយសុវត្ថិភាព៕ ប្រែសម្រួល៖ស៊ុនលី
