តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បានថ្កោលទោស ចំពោះការអះអាងរបស់ក្រុមទាំងប្រាំពីរ (G7) ជុំវិញសកម្មភាពនុយក្លេអ៊ែររបស់ប្រទេសលោកថា ជាការប្រឆាំងនឹងទីក្រុងតេអេរ៉ង់។
ប្រតិកម្មទៅនឹងសេចក្តីថ្លែងការណ៍របស់ G7 ដែលចេញកាលពីថ្ងៃសុក្រ លោក Kanaani បានសង្កត់ធ្ងន់នៅក្នុងសេចក្តីថ្លែងការណ៍មួយថា កម្មវិធីនុយក្លេអ៊ែររបស់អ៊ីរ៉ង់ គឺ “សន្តិភាពទាំងស្រុង” ។
លោកបានលើកឡើងថា អ៊ីរ៉ង់នឹងអនុវត្តគម្រោង និងផែនការនុយក្លេអ៊ែរ “សន្តិភាព” របស់ខ្លួន ស្របតាមសន្ធិសញ្ញាមិនរីកសាយភាយ និងកិច្ចព្រមព្រៀងការពារ ដោយមិនគិតពីសម្ពាធនយោបាយ និង “យុទ្ធនាការឃោសនា”។
លោកបានឲ្យដឹងថា ការលើកឡើងរបស់សេចក្តីថ្លែងការណ៍អំពីដំណោះស្រាយប្រឆាំងនឹងអ៊ីរ៉ង់របស់ក្រុមប្រឹក្សាភិបាលនៃទីភ្នាក់ងារថាមពលបរមាណូអន្តរជាតិ (IAEA) គឺជាភស្តុតាងមួយផ្សេងទៀតនៃ “វិធីសាស្រ្តនយោបាយដែលបន្តដោយអ្នកដែលនៅពីក្រោយដំណោះស្រាយ” និង “ការរំលោភបំពាន” របស់រដ្ឋាភិបាលមួយចំនួន ចំពោះយន្តការអន្តរជាតិ ប្រឆាំងនឹងរដ្ឋឯករាជ្យ។
សេចក្តីថ្លែងការណ៍បានអំពាវនាវដល់ទីក្រុងតេអេរ៉ង់ឱ្យ “បញ្ឈប់និងបញ្ច្រាសការកើនឡើងនុយក្លេអ៊ែរ បញ្ឈប់សកម្មភាពចម្រាញ់សារធាតុអ៊ុយរ៉ានីញ៉ូម ដែលកំពុងបន្តចូលរួមក្នុងកិច្ចសន្ទនាដ៏ធ្ងន់ធ្ងរផ្តល់ការធានាថា កម្មវិធីនុយក្លេអ៊ែររបស់ខ្លួនមានសន្តិភាពផ្តាច់មុខ សហការយ៉ាងពេញលេញជាមួយ IAEA និងគោរពតាមយន្តការត្រួតពិនិត្យ និងផ្ទៀងផ្ទាត់របស់ទីភ្នាក់ងារ រួមទាំងសេចក្តីសម្រេចរបស់ក្រុមប្រឹក្សាភិបាលថ្ងៃទី០៥ ខែមិថុនា”។
ដំណោះស្រាយរបស់ក្រុមប្រឹក្សាភិបាលរបស់ IAEA បានជំរុញឱ្យអ៊ីរ៉ង់ “បង្កើនកិច្ចសហប្រតិបត្តិការជាមួយ IAEA និងបដិសេធការរារាំងអ្នកត្រួតពិនិត្យនាពេលថ្មីៗនេះ”៕
ប្រែសម្រួល ឈូក បូរ៉ា
