បរទេស៖ យោងតាមការចេញផ្សាយរបស់ RT នាយករដ្ឋមន្ត្រីម៉ាឡេស៊ី លោក Anwar Ibrahim បាននិយាយថា ប្រទេសម៉ាឡេស៊ីបានសម្រេចចិត្តដាក់ពាក្យសុំចូលជាសមាជិក BRICS ហើយនឹងចាប់ផ្តើមដាក់ឯកសារជាផ្លូវការក្នុងពេលឆាប់ៗនេះ។
មេដឹកនាំអាយុ៧៧ឆ្នាំនៃប្រជាជាតិអាស៊ីអាគ្នេយ៍រូបនេះបានលើកឡើងពីការសម្រេចចិត្តនេះនៅក្នុងបទសម្ភាសន៍ជាមួយសារព័ត៌មានចិន Guancha ដែលបានចេញផ្សាយកាលពីថ្ងៃអាទិត្យ។
លោកបានថ្លែងបែបនេះថា៖យើងបានធ្វើគោលនយោបាយរបស់យើងច្បាស់លាស់ ហើយយើងបានធ្វើការសម្រេចចិត្តរួចរាល់ហើយដែរ។ យើងនឹងចាប់ផ្តើមដំណើរការផ្លូវការក្នុងពេលឆាប់ៗនេះ។ម៉ាឡេស៊ីកំពុងរង់ចាំលទ្ធផលចុងក្រោយ និងមតិកែលម្អពីរដ្ឋាភិបាលអាហ្វ្រិកខាងត្បូងជាមុនសិន។
លោក Anwar ក៏បានលើកឡើងអំពីការលើកយកប្រធានបទនេះឡើងក្នុងជំនួបជាមួយប្រធានាធិបតីប្រេស៊ីល Luiz Inacio Lula da Silva កាលពីពេលថ្មីៗនេះ។
គួរឲ្យដឹងដែរថាប្លុកសេដ្ឋកិច្ចដ៏ធំនេះត្រូវបានបង្កើតឡើងក្នុងឆ្នាំ២០០៦ដោយប្រទេសប្រេស៊ីល រុស្ស៊ី ឥណ្ឌា និងចិន ជាមួយនឹងប្រទេសអាហ្វ្រិកខាងត្បូងចូលរួមនៅក្នុងឆ្នាំ២០១១។ ក្នុងខែមករា BRICS បានទទួលស្គាល់ជាផ្លូវការនូវប្រទេសអេហ្ស៊ីប អេត្យូពី អ៊ីរ៉ង់ និងអារ៉ាប់រួម (UAE) ប៉ុន្តែបានសម្រេចចិត្តរក្សាឈ្មោះបច្ចុប្បន្ននៅឡើយ៕ ប្រែសម្រួល៖ស៊ុនលី
