បរទេស៖ អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃសុក្រថា ពិភពលោកកំពុងស្ថិតនៅលើគែមនៃគ្រោះមហន្តរាយ ដោយចង្អុលទៅហានិភ័យនៃជម្លោះដ៏ខ្លាំងក្លារវាងអ៊ីស្រាអែល និងក្រុមហេសបូឡា។
យោងតាមសារព័ត៌មាន RT ចេញផ្សាយនៅថ្ងៃទី២១ ខែមិថុនា ឆ្នាំ២០២៤ បានឱ្យដឹងថា ប្រមុខកងជីវពល Shia លោក Hassan Nasrallah បានព្រមានកាលពីថ្ងៃពុធថា ក្រុមហេសបូឡា ត្រូវបានរៀបចំសម្រាប់ជម្លោះពេញលេញជាមួយក្រុងហ្សេរុយសាឡឹមខាងលិច (អ៊ីស្រាអែល) ហើយអាចឈ្លានពានទឹកដីភាគខាងជើងរបស់រដ្ឋជ្វីហ្វ ក្នុងករណីមានការកើនឡើងភាពតានតឹងបន្ថែមទៀត។ ការថ្លែងនេះបានធ្វើឡើងបន្ទាប់ពីមេបញ្ជាការជាន់ខ្ពស់មួយរូបរបស់ក្រុមគឺលោក Hajj Sami Taleb Abdullah ត្រូវបានសម្លាប់ក្នុងការវាយប្រហាររបស់អ៊ីស្រាអែលលើភាគខាងត្បូងប្រទេសលីបង់កាលពីសប្តាហ៍មុន។
អគ្គលេខាធិការអង្គការសហប្រជាជាតិ លោក Antonio Guterres បានប្រាប់អ្នកយកព័ត៌មានក្នុងសន្និសីទសារព័ត៌មានថា “ការផ្លាស់ប្តូរដែលរហ័ស – ការគណនាខុស គឺអាចបង្កឱ្យមានមហន្តរាយដែលហួសពីព្រំដែន ហើយនិយាយដោយត្រង់ទៅហួសពីការស្មាន” ។ លោកថា “ពិភពលោកមិនអាចឱ្យមានលទ្ធភាពឱ្យលីបង់ក្លាយជាតំបន់ហ្គាហ្សាមួយផ្សេងទៀតបានទេ។ ” លោកបានអំពាវនាវឱ្យភាគីទាំងសងខាង«ប្ដេជ្ញាចិត្តជាបន្ទាន់» ដើម្បីសន្តិភាព។
លោក Guterres បាននិយាយថា “ពិភពលោកត្រូវតែនិយាយខ្លាំងៗ និងច្បាស់ថា ការបន្ថយការកើនឡើងភាពតានតឹងជាបន្ទាន់គឺមិនត្រឹមតែអាចធ្វើទៅបានប៉ុណ្ណោះទេ តែវាគឺជាការចាំបាច់” ។ លោកបាននិយាយថា៖ «គ្មានដំណោះស្រាយខាងយោធាទេ» ដោយបន្ថែមថាមនុស្សជាច្រើនបានបាត់បង់ជីវិត ឬត្រូវបានគេបណ្ដេញចេញពីផ្ទះទាំងនៅលីបង់ និងអ៊ីស្រាអែល។
លោក Guterres បានបន្ថែមថា កងរក្សាសន្តិភាពរបស់អង្គការសហប្រជាជាតិកំពុង “ធ្វើការដើម្បីបន្ថយភាពតានតឹង និងជួយការពារការគណនាខុស ក្នុងបរិយាកាសដ៏លំបាកខ្លាំង” ដោយលោកមិនបានផ្តល់ព័ត៌មានលម្អិតជាក់លាក់ណាមួយឡើយ៕ ប្រែសម្រួលៈ ណៃ តុលា
