មេដឹកនាំរដ្ឋប្រហារដែលបរាជ័យ ក្នុងប្រទេសបូលីវី ត្រូវបានឃុំខ្លួន បន្ទាប់ពីកងទ័ពប្រដាប់ ដោយអាវុធធុនធ្ងន់ ត្រឡប់ចូលបន្ទាយវិញ

បរទេស៖ ទាហានប្រដាប់ដោយអាវុធធុនធ្ងន់ លើរថពាសដែកបានដក ខ្លួនចេញពីកណ្តាលទីលាន Plaza Murillo ក្នុងរដ្ឋធានី La Paz ប្រទេសបូលីវី បន្ទាប់ពីប្រធានាធិបតី Luis Arce បានបរិហារអ្វីដែលលោកបាននិយាយថា ជាការប៉ុនប៉ងធ្វើរដ្ឋប្រហារប្រឆាំងនឹងរដ្ឋាភិបាលរបស់លោក។

យោងតាមសារព័ត៌មាន RT ចេញផ្សាយនៅថ្ងៃទី២៦ ខែមិថុនា ឆ្នាំ២០២៤ បានឱ្យដឹងថា ទាហានមួយក្រុមដឹកនាំដោយមេបញ្ជាការកងកម្លាំងប្រដាប់អាវុធ ឧត្តមសេនីយ៍ Juan Jose Zuniga បានកាន់កាប់ទីលានកាលពីថ្ងៃពុធ ហើយបានចូលទៅក្នុងវិមានប្រធានាធិបតី។ ប្រធានាធិបតី Luis Arce បានថ្កោលទោស “ការចល័តមិនទៀងទាត់នៃអង្គភាពមួយចំនួននៃកងទ័ពបូលីវី” ហើយបានបណ្តេញលោក Zuniga ដោយជំនួសដោយ Jose Wilson Sanchez ។

បន្ទាប់មក លោក Sanchez បានបញ្ជាឱ្យកងទ័ពចាកចេញពីទីលានភ្លាមៗ។ មេបញ្ជាការថ្មីបាននិយាយនៅក្នុងសុន្ទរកថាដំបូងរបស់លោកថា “បុគ្គលិកទាំងអស់ដែលបានប្រមូលផ្តុំនៅតាមដងផ្លូវ ត្រូវតែត្រលប់ទៅអង្គភាពរបស់ពួកគេវិញ” ។

យោងតាមប្រព័ន្ធផ្សព្វផ្សាយរបស់ប្រទេសបូលីវី , លោក Zuniga ត្រូវបានឃុំខ្លួន និងចោទប្រកាន់ពីបទ “អំពើភេរវកម្ម និងការបះបោរប្រដាប់អាវុធប្រឆាំងនឹងសន្តិសុខ និងអធិបតេយ្យភាពរបស់រដ្ឋ”។

ក្រោយមក លោក Arce បានបង្ហាញខ្លួននៅលើយ៉រនៃវិមានប្រធានាធិបតីដោយថ្លែងអំណរគុណដល់អ្នកគាំទ្ររបស់គាត់។ លោកប្រធានាធិបតី បានប្រាប់អ្នកគាំទ្រដែលរីករាយថា៖ «គ្មាននរណាម្នាក់អាចយកលទ្ធិប្រជាធិបតេយ្យដែលយើងបានឈ្នះនៅក្នុងប្រអប់ឆ្នោតនោះទេ។ “យើងនឹងបន្តធ្វើការសម្រាប់ប្រជាជនបូលីវី”។

ភ្លាមៗបន្ទាប់ពីកងទ័ពត្រូវបានដាក់ពង្រាយទៅកាន់ទីក្រុង La Paz អ្នកគាំទ្ររបស់លោក Arce និងគណបក្សកាន់អំណាចដើម្បីសង្គមនិយម (MAS) បានដើរតាមផ្លូវដោយទាមទារឱ្យកងទ័ពត្រឡប់ទៅបន្ទាយរបស់ពួកគេវិញ។ អ្នកនយោបាយ និងមន្ត្រីជាច្រើនបានបរិហារសកម្មភាពរបស់កងទ័ព ក៏ដូចជាសហភាពអឺរ៉ុប និងមេដឹកនាំភាគច្រើននៃអាមេរិកខាងត្បូងដែរ បានប្រឆាំងនឹងរដ្ឋប្រហារនេះផងដែរ៕
ប្រែសម្រួលៈ ណៃ តុលា