មូលដ្ឋានយោធា អាមេរិកនៅអឺរ៉ុប ដាក់ការប្រុងប្រយ័ត្នខ្ពស់ ចំពោះការវាយប្រហារ ភេរវកម្មដែលនឹង អាចកើតឡើង នៅសប្តាហ៍ក្រោយ

បរទេស ៖ ប្រព័ន្ធផ្សព្វផ្សាយ អាមេរិកជាច្រើន បានផ្សាយកាលពីថ្ងៃអាទិត្យ ដោយដកស្រង់ប្រភពពីមន្ទីរប៉ង់តាហ្គោនថា មូលដ្ឋានយោធាអាមេរិក ទាំងអស់នៅក្នុងទ្វីបអឺរ៉ុបត្រូវបានដាក់ ឱ្យមានការប្រុងប្រយ័ត្នខ្ពស់ ដោយសារតែការគំរាមកំហែង ភេរវករដែលមានសក្តានុពល ប្រឆាំងនឹងគ្រឿងបរិក្ខារ ឬបុគ្គលិក ។

យោងតាមសារព័ត៌មាន RT ចេញផ្សាយនៅថ្ងៃទី១ ខែកក្កដា ឆ្នាំ២០២៤ បានឱ្យដឹងថា មន្ត្រីមិនបញ្ចេញឈ្មោះម្នាក់បានប្រាប់សារព័ត៌មាន Fox News ថា៖ «មានព័ត៌មានដែលគួរឲ្យជឿទុកចិត្តបានចង្អុលទៅការវាយប្រហារប្រឆាំងនឹងមូលដ្ឋានទ័ពអាមេរិកនៅអឺរ៉ុបក្នុងសប្តាហ៍ក្រោយ»។

យោងតាមប្រភពដដែល គឺមូលដ្ឋាន ផ្សេងគ្នា រួមទាំងយោធភូមិភាគកងទ័ពនៅទីក្រុង Stuttgart ប្រទេសអាល្លឺម៉ង់ ដែលជាម្ចាស់ផ្ទះបញ្ជាការអឺរ៉ុប របស់សហរដ្ឋអាមេរិក បានបង្កើនការគំរាមកំហែងស្ថានភាពចំពោះ Force Protection ‘Charlie’ ។ កម្រិតនេះអនុវត្ត “នៅពេលដែលឧប្បត្តិហេតុកើតឡើង ឬមានការស៊ើបការណ៍ សម្ងាត់ត្រូវបានទទួល ដែលបង្ហាញពីទម្រង់នៃសកម្មភាពភេរវករ ឬគោលដៅប្រឆាំងនឹងបុគ្គលិក ឬមធ្យោបាយនានាទំនង ជានឹងកើតឡើង។

មន្ត្រីអាមេរិក ដែលឈរជើង នៅមូលដ្ឋានមួយបានប្រាប់ CNN ថា កម្រិតនៃការគំរាមកំហែង នៃប្រភេទនេះមិនត្រូវបានធ្វើឱ្យសកម្ម “ក្នុងរយៈពេល យ៉ាងហោច ណាស់ដប់ឆ្នាំ” ដោយបន្ថែមថា វាត្រូវបានអនុវត្តជាទូទៅ នៅពេលដែលយោធាប្រឈមនឹង “ការគំរាមកំហែង ដែលអាចទុកចិត្តបាន” ៕
ប្រែសម្រួលៈ ណៃ តុលា