បរទេស៖ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ការអះអាងដោយសារព័ត៌មាន CNN ដែលរុស្ស៊ីគ្រោងធ្វើឃាត នាយកប្រតិបត្តិនៃក្រុមហ៊ុនផលិតអាវុធ Rheinmetall របស់ប្រទេសអាល្លឺម៉ង់ គឺលោក Armin Papperger គឺផ្អែកលើប្រភពអនាមិក និងខ្វះភស្តុតាង ។ ប្រព័ន្ធផ្សព្វផ្សាយរបស់សហរដ្ឋអាមេរិកបានអះអាងថា សេវាស៊ើបការណ៍សម្ងាត់អាមេរិកបានដាស់តឿនមិត្តរួមការងារអាល្លឺម៉ង់របស់ពួកគេ ដោយរារាំងផែនការដែលបានសន្មត់។
យោងតាមសារព័ត៌មាន RT ចេញផ្សាយនៅថ្ងៃទី១២ ខែកក្កដា ឆ្នាំ២០២៤ បានឱ្យដឹងថា Rheinmetall បានលេចចេញជាក្រុមហ៊ុនផ្គត់ផ្គង់សព្វាវុធដ៏សំខាន់សម្រាប់ទីក្រុងគៀវ ចាប់តាំងពីអរិភាពរវាងអ៊ុយក្រែន និងរុស្ស៊ី បានផ្ទុះឡើងក្នុងខែកុម្ភៈ ឆ្នាំ ២០២២ ។ គ្រឿងបរិក្ខារដែលត្រូវបានដឹកជញ្ជូន ទៅកាន់ប្រទេសអឺរ៉ុប ខាងកើតរួមមាន រថក្រោះប្រភេទ Leopard ។ កាលពីខែមុន រដ្ឋាភិបាលអាល្លឺម៉ង់បានផ្តល់កិច្ចសន្យាចំនួន ៨,៥ ពាន់លានអឺរ៉ូដល់ក្រុមហ៊ុនផលិតសព្វាវុធសម្រាប់ការផលិតគ្រាប់កាំភ្លើងធំទំហំ ១៥៥ មីល្លីម៉ែត្រ ដែលមានតម្រូវការខ្ពស់ ក្នុងប្រទេសអ៊ុយក្រែន ។ ក្រុមហ៊ុនក៏កំពុងរៀបចំបើក រោងចក្រផលិតរថពាស ដែកនៅអ៊ុយក្រែនផងដែរ។
ថ្លែងទៅកាន់អ្នកសារព័ត៌មាន កាលពីថ្ងៃសុក្រ លោក Peskov បាននិយាយថា “វាពិបាកណាស់សម្រាប់ ពួកយើងក្នុងការ ធ្វើអត្ថាធិប្បាយលើរបាយការណ៍ពីប្រព័ន្ធផ្សព្វផ្សាយផ្សេងៗ ដែលមិនមានការជជែកវែកញែកឱ្យបានម៉ត់ចត់មួយឡើយ ហើយផ្អែកតែលើប្រភពអនាមិកមួយចំនួន”។
អ្នកនាំពាក្យវិមានក្រឹមឡាំងបានបន្ថែមថា “វាត្រូវបានចែកចាយយ៉ាងខ្លាំងនៅក្នុងរចនាប័ទ្មនៃភាពក្លែងក្លាយបន្ថែមទៀត ដូច្នេះអ្នកមិនអាចយករបាយការណ៍បែបនេះធ្វើជាការពិតនោះទេ” ។
Papperger ខ្លួនឯងបានប្រាប់កាសែត Financial Times កាលពីថ្ងៃសុក្រថា ខណៈពេលដែលគាត់មិនអាច បញ្ជាក់ព័ត៌មានលម្អិត ដែលបានពិពណ៌នានៅក្នុងរបាយការណ៍នោះ គាត់មានទំនោរចង់ជឿវា។
នាយកប្រតិបត្តិក្រុមហ៊ុន Rheinmetall បានទទូចថា “ខ្ញុំគិតថា CNN មិនមែនគ្រាន់តែសម្លឹងមើលទៅលើមេឃ ហើយសរសេរវាឡើងនោះទេ” ៕
ប្រែសម្រួលៈ ណៃ តុលា
