បរទេស៖ បេក្ខភាពប្រធានាធិបតីអាមេរិកឯករាជ្យ លោក Robert F. Kennedy Jr. នឹងត្រូវបានផ្តល់ការការពារផ្នែកសម្ងាត់បន្ទាប់ពីមានការប៉ុនប៉ងធ្វើឃាតអតីតប្រធានាធិបតី Donald Trump ។ នេះបើយោងតាមរដ្ឋមន្ត្រីសន្តិសុខមាតុភូមិ Alejandro Mayorkas បានប្រកាសកាលពីថ្ងៃចន្ទ។
យោងតាមសារព័ត៌មាន RT ចេញផ្សាយនៅថ្ងៃទី១៦ ខែកក្កដា ឆ្នាំ២០២៤ បានឱ្យដឹងថា លោក RFK Jr.
ដែលឪពុករបស់លោក Bobby Kennedy ត្រូវបានសម្លាប់យ៉ាងអាណោចអាធ័មនៅលើផ្លូវយុទ្ធនាការនោះ
បានស្នើសុំការការពារជាយូរមកហើយ ដោយសារតែឧប្បត្តិហេតុសន្តិសុខជាច្រើន។
លោក Mayorkas រដ្ឋមន្ត្រីសន្តិសុខមាតុភូមិ បាននិយាយថា “នៅក្នុងពន្លឺនៃព្រឹត្តិការណ៍ចុងសប្តាហ៍នេះ ប្រធានាធិបតី Joe Bidenបានណែនាំខ្ញុំឱ្យធ្វើការជាមួយសេវាសម្ងាត់ដើម្បីផ្តល់ការការពារដល់ លោក Robert Kennedy Jr” ។
លោក Kennedy បាននិយាយនៅក្នុងសេចក្តីថ្លែងការណ៍មួយដោយសម្តែងការដឹងគុណដល់ក្រុមហ៊ុនសន្តិសុខ Gavin de Becker & Associatesសម្រាប់ “ការរក្សាសុវត្ថិភាពខ្ញុំសម្រាប់រយៈពេល ១៥ ខែចុងក្រោយនៃយុទ្ធនាការប្រធានាធិបតីរបស់ខ្ញុំ” ។”សូមអរគុណលោកប្រធានាធិបតី Biden សម្រាប់ការពង្រីកការការពារសេវាកម្មសម្ងាត់ឱ្យខ្ញុំ” ។
ការប្រកាសនេះកើតឡើងភ្លាមៗបន្ទាប់ពីលោក Trump ទាមទារឱ្យលោក Kennedyទទួលបានការការពារ។ អតីតប្រធានាធិបតីរូបនេះបានសរសេរនៅលើ Truth Socialថា “ដោយគិតពីអ្វីដែលកំពុងកើតឡើងនៅក្នុងពិភពលោកនាពេលបច្ចុប្បន្ននេះ ខ្ញុំជឿថាវាចាំបាច់ណាស់ដែល Robert F. Kennedy Jr.ទទួលបានការការពារសេវាកម្មសម្ងាត់ជាបន្ទាន់” ។ “ដោយគិតពីប្រវត្តិគ្រួសារ Kennedy នេះជារឿងត្រឹមត្រូវដែលត្រូវធ្វើ!”៕
ប្រែសម្រួលៈ ណៃ តុលា
