បរទេស៖ កាលពីខែមុនចំនួន នៃការប្រកាសក្ស័យធន នៅក្នុងប្រទេសអង់គ្លេស និងប្រទេសវេលស៍បានឈាន ដល់កម្រិតខ្ពស់បំផុតក្នុងរយៈពេលជាងមួយឆ្នាំមុន ដោយសារការកើនឡើងអត្រា ការប្រាក់បានថ្លឹងថ្លែងលើ ថវិការបស់ក្រុមហ៊ុន នេះបើយោងតាមរបាយការណ៍ របស់សេវាក្ស័យធន របស់ចក្រភពអង់គ្លេស ចេញកាលពីថ្ងៃសុក្រ។
យោងតាមសារព័ត៌មាន RT ចេញផ្សាយនៅថ្ងៃទី១៩ ខែកក្កដា ឆ្នាំ២០២៤ បានឱ្យដឹងថាយោងតាមទិន្នន័យ, ក្រុមហ៊ុនចំនួន ២.៣៦១ បានឈប់ធ្វើអាជីវកម្មកាលពីខែមុន ដែលនេះបានកើនឡើង 17% បើធៀបនឹងខែដូចគ្នាកាលពីឆ្នាំមុន។ របាយការណ៍បាននិយាយថា វាជាចំនួនខ្ពស់បំផុត ចាប់តាំងពីខែឧសភា ឆ្នាំ ២០២៣ ហើយជាចំនួនខ្ពស់បំផុត ទីបីនៅលើកំណត់ត្រា ដែលបានត្រលប់ទៅឆ្នាំ ២០០០ ។
ទិន្នន័យបានបង្ហាញថា សំណង់គឺជាឧស្សាហកម្ម ដែលរងផលប៉ះពាល់ខ្លាំងបំផុត បន្ទាប់ពីការធ្លាក់ចុះ នៃទីផ្សារលំនៅដ្ឋាន ដោយមានក្រុមហ៊ុនចំនួន ១.៧០០ បានក្ស័យធននៅចន្លោះ ខែមករាដល់ខែឧសភាឆ្នាំ ២០២៤ ។
ឧស្សាហកម្មពាណិជ្ជកម្ម រួមទាំងវិស័យលក់រាយ និងលក់ដុំ ក៏ដូចជាសេវាកម្មស្នាក់នៅ និងអាហារ ភោជនីយដ្ឋាន និងបារ ត្រូវបានរងផលប៉ះពាល់ដោយការធ្លាក់ចុះ នៃតម្រូវការអ្នកប្រើប្រាស់ ហើយបានឃើញ ក្រុមហ៊ុនប្រហែល ៣.០០០ ដាក់ពាក្យក្ស័យធនក្នុង រយៈពេលដែលបានរាយការណ៍ ។
អ្នកជំនាញបាន និយាយថា អត្រាការប្រាក់ក្នុងកម្រិត ដែលមិន បានឃើញ នៅក្នុងចក្រភព អង់គ្លេសអស់ រយៈពេលជាង មួយទសវត្សរ៍ កំពុងជំរុញឱ្យតម្លៃនៃការខ្ចីប្រាក់កើនឡើង រួមជាមួយនឹងអតិផរណាខ្ពស់ ទំនុកចិត្តអ្នកប្រើប្រាស់ទន់ខ្សោយ និងការកើនឡើង ថ្លៃដើមប្រតិបត្តិការ ដែលបណ្តាលឱ្យមានការ ខាតបង់យ៉ាងខ្លាំង លើតារាងតុល្យការរបស់ក្រុមហ៊ុន៕
ប្រែសម្រួលៈ ណៃ តុលា
