វៀងច័ន្ទន៍៖ រដ្ឋាភិបាលយោធាមីយ៉ាន់ម៉ា នឹងបញ្ជូន មន្ត្រីជាន់ខ្ពស់មួយរូប ទៅចូលរួមកិច្ចប្រជុំ រដ្ឋមន្ត្រីការបរទេស នៃសមាគមប្រជាជាតិអាស៊ីអាគ្នេយ៍នៅប្រទេសឡាវ នៅចុងសប្តាហ៍នេះ ។
វានឹងក្លាយជាការចូលរួមលើកទីបីជាប់ៗគ្នារបស់មន្ត្រីជាន់ខ្ពស់មកពីរបបយោធាមីយ៉ាន់ម៉ា ដែលជាសមាជិកអាស៊ាន នៅក្នុងកិច្ចប្រជុំក្រុមក្នុងតំបន់នៅប្រទេសឡាវ ដែលជាប្រធានបច្ចុប្បន្ន បន្ទាប់ពីកិច្ចប្រជុំរដ្ឋមន្ត្រីការបរទេសកាលពីខែមករា និងកិច្ចប្រជុំរដ្ឋមន្ត្រីការពារជាតិក្នុងខែមីនា។
របបយោធាដែលបានបណ្តេញរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី ក្នុងរដ្ឋប្រហារខែកុម្ភៈ ឆ្នាំ២០២១ ពីមុនបានធ្វើពហិការកិច្ចប្រជុំថ្នាក់រដ្ឋមន្ត្រីអាស៊ាន បន្ទាប់ពីសមាជិកផ្សេងទៀត បានសម្រេចចិត្តក្នុងខែតុលា ឆ្នាំ២០២១ ដើម្បីអនុញ្ញាតឱ្យមានតែតំណាងមិនមែន នយោបាយមកពីមីយ៉ាន់ម៉ាចូលរួម។
ប្រភពបានឲ្យដឹងថា មន្ត្រីជាន់ខ្ពស់នឹងមានលោក Aung Kyaw Moe លេខាធិការអចិន្ត្រៃយ៍នៃក្រសួងការបរទេសមីយ៉ាន់ម៉ា ។ លោកនឹងចូលរួមកិច្ចប្រជុំ នៅទីក្រុងវៀងចន្ទន៍ នៅថ្ងៃព្រហស្បតិ៍ និងកិច្ចពិភាក្សា ដែលពាក់ព័ន្ធនឹងរដ្ឋមន្ត្រី ការបរទេសរបស់ប្រទេសជាដៃគូអាស៊ាន រួមទាំងវេទិកាតំបន់អាស៊ាននៅថ្ងៃសៅរ៍ ដែលរដ្ឋមន្ត្រីការបរទេស សហរដ្ឋអាមេរិកលោក Antony Blinken នឹងចូលរួមផងដែរ។
យោងតាមប្រភពបានឱ្យដឹងថា ប្រទេសកូរ៉េខាងជើង នឹងមិនបញ្ជូនរដ្ឋមន្ត្រីការបរទេសរបស់ខ្លួនទៅកិច្ចពិភាក្សា ARF ដែលជាព្រឹត្តិការណ៍ពហុភាគីមួយចំនួន ដែលពាក់ព័ន្ធនឹងប្រទេសនេះទេ ដោយឯកអគ្គរដ្ឋទូតរបស់ខ្លួនប្រចាំនៅប្រទេសឡាវ នឹងចូលរួមជំនួសវិញ៕
ប្រែសម្រួល ឈូក បូរ៉ា
