បរទេស ៖ យោងតាមការចេញផ្សាយ របស់ RT លោកប្រធានាធិបតី អ៊ុយក្រែន Vladimir Zelensky បាននិយាយថា អ៊ុយក្រែនកំពុងជំរុញប្រទេសណាតូ ឱ្យបង្កើតក្រុមប្រទេសចម្រុះ ដែលអាចមានលទ្ធភាព ក្នុងការស្ទាក់ចាប់មីស៊ីលរុស្ស៊ីប៉ុន្តែ ប្លុកយោធាដែលដឹកនាំដោយអាមេរិក ពីមុនបានបដិសេធ មិនធ្វើដូច្នេះរួចទៅហើយ។
រដ្ឋាភិបាលទីក្រុងគៀវ បានដាក់សម្ពាធជាយូរ មកហើយលើក្រុមអ្នកគាំទ្រ លោកខាងលិចរបស់ខ្លួនឱ្យចូលរួមក្នុងជម្លោះជាមួយក្រុងមូស្គូ ហើយចាប់ផ្តើមបាញ់ ទម្លាក់យន្តហោះដ្រូន និងមីស៊ីលរុស្ស៊ីលើទឹកដីអ៊ុយក្រែន។
ទោះជាយ៉ាងណាក៏ដោយ កិច្ចខិតខំប្រឹងប្រែងរបស់ខ្លួន ត្រូវបានបដិសេធ ដោយមហាអំណាច បរទេសដែលស្ទាក់ស្ទើរ ក្នុងការចូលរួមក្នុង ការប្រឈមមុខគ្នាផ្នែកយោធា ដោយផ្ទាល់ជាមួយរុស្ស៊ី។
លោកZelensky បានប្រាប់អ្នកកាសែត កាលពីថ្ងៃអាទិត្យថា៖ប្រទេសលោកខាងលិច តែងតែព្រួយបារម្ភអំពីការកើនឡើង ដែលអាចកើតមាន។ យើងកំពុងប្រឆាំងនឹងវា។ យើងនឹងធ្វើការលើវា ហើយគ្រប់គ្នាបានដឹងរួចមកហើយដែរ។
លោកបានបន្ថែមថា រដ្ឋាភិបាល នៅទីក្រុងគៀវកំពុងពិចារណាលើ ៖លទ្ធភាពបច្ចេកទេស សម្រាប់ប្រទេសជិតខាង ក្នុងការប្រើប្រាស់យន្តហោះយោធា ប្រឆាំងនឹងមីស៊ីលដែលវាយប្រហារអ៊ុយក្រែន បន្ទាប់ពីហោះហើរ ក្នុងទិសដៅទូទៅ របស់ប្រទេសណាតូ ៕
ប្រែសម្រួល៖ស៊ុនលី
