បេរូត៖ ទូរទស្សន៍ក្នុងស្រុក al-Manar បានរាយការណ៍ថា មេដឹកនាំក្រុមហេសបូឡា លោក Sayyed Hassan Nasrallah បានប្តេជ្ញាសងសឹកយ៉ាងខ្លាំងក្លា និងមានឥទ្ធិពលប្រឆាំងនឹងអ៊ីស្រាអែល ចំពោះការធ្វើឃាតមេបញ្ជាការយោធាជាន់ខ្ពស់របស់ខ្លួន គឺលោក Fouad Shokor ។
លោក Nasrallah បានឲ្យដឹង នៅក្នុងសុន្ទរកថា តាមទូរទស្សន៍មួយថា “ការសងសឹករបស់យើង ចំពោះការធ្វើឃាតមេបញ្ជាការ របស់យើងគឺកើតឡើង ដោយជៀសមិនរួច ហើយវានឹងមានផលប៉ះពាល់ និងខ្លាំងក្លា។ យើងអាចជ្រើសរើសការសងសឹកដោយសហការ ជាមួយមហាអំណាចតស៊ូផ្សេងទៀត នៅក្នុងប្រទេសអ៊ីរ៉ង់ និងយេម៉ែន ឬផ្សេងទៀត” ។
លោកបានបន្ថែមថា “នេះគឺជាសង្រ្គាមដ៏ធំមួយ ហើយឈាមរបស់ប្រជាជនយើងថ្លៃពេក ហើយជាទីស្រឡាញ់។ ការធ្វើឃាតនឹងមិនឆ្លងកាត់ដោយគ្មានការសងសឹកឡើយ”។
លោកក៏បានគំរាមវាយប្រហាររោងចក្រនៅភាគខាងជើងប្រទេសអ៊ីស្រាអែលផងដែរ ដែលនីមួយៗមានតម្លៃរាប់ពាន់លានដុល្លារអាមេរិក នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានបន្ដថា “ទាំងអស់នេះមានទីតាំងនៅភាគខាងជើងប្រទេសអ៊ីស្រាអែល វាត្រូវចំណាយពេល ៣៤ឆ្នាំដើម្បីសាងសង់រោងចក្រទាំងអស់នេះ ប៉ុន្តែត្រូវចំណាយពេលកន្លះម៉ោងដើម្បីបំផ្លាញពួកវាទាំងអស់” ។
លោកបានបន្ដថា អ៊ីស្រាអែលបង្កើតបានគ្រោះថ្នាក់ធំមួយក្នុងតំបន់។ គ្រោះថ្នាក់នេះមិនអាចប្រឈមមុខនឹងការភ័យខ្លាច និងការស្ទាក់ស្ទើរនោះទេ ប្រជាជនម៉ូស្លីមទាំងអស់ត្រូវតែមានការទទួលខុសត្រូវរបស់ពួកគេ”៕
ប្រែសម្រួល ឈូក បូរ៉ា
