បរទេស៖ ប្រទេសបង់ក្លាដែសកំពុងប្រឈមមុខនឹងស្ថានការណ៍ចលាចលដោយលោកស្រី Sheikh Hasina បានលាលែងពីតំណែងនាយករដ្ឋមន្ត្រី បន្ទាប់ពីមានការតវ៉ាដ៏កក្រើកទូទាំងប្រទេស។
ចំពេលភាពភ័យរន្ធត់កាន់តែខ្លាំងឡើង ដែលប្រទេសនេះបានឃើញនាពេលថ្មីៗនេះបន្ទាប់ពី ការលើកឡើងរបស់រដ្ឋាភិបាលអំពីប្រព័ន្ធកូតាការងាររបស់រដ្ឋាភិបាលមកនោះ លោកស្រី Sheikh Hasina បានភៀសខ្លួនទៅកាន់ប្រទេសឥណ្ឌាដើម្បីស្វែងរកសិទ្ធិជ្រកកោនបន្ថែមទៀតនៅក្នុងចក្រភពអង់គ្លេស។
យោងតាមគេហទំព័រ FREE PRESS JOURNAL ចេញផ្សាយកាលពីថ្ងៃទី៦ ខែសីហា ឆ្នាំ២០២៤ បានឱ្យដឹងថា នៅពេលដែលលោកស្រីបានប្រកាសលាលែងពីតំណែង និងចាកចេញពីវិមាននាយករដ្ឋមន្ត្រីជាផ្លូវការ ហើយអគារលំនៅដ្ឋានរនស់លោកស្រី ក៏ត្រូវបានក្រុមបាតុករវាយឆ្មក់ចូល។
ក្នុងនាមនៃភាពច្របូកច្របល់ ក្រុមបាតុករបានចូលទៅក្នុងផ្ទះរបស់លោកស្រី Sheikh Hasina ហើយលួចយកអ្វីដែលពួកគេអាចធ្វើបាន។ ដោយគ្មានការខ្មាស់អៀន ពួកគេថែមទាំងយកសូម្បីតែខោអាវក្នុងរបស់លោកស្រីដូចជាអាវទ្រនាប់ ហើយរើសយកច្បាប់ចម្លងគម្ពីរសាសនា Holy Quran ពីកន្លែងនោះ។ រាប់តាំងពីគ្រឿងសង្ហារិមរហូតដល់គ្រឿងអេឡិចត្រូនិច រូបភាពដ៏គួរឱ្យភ្ញាក់ផ្អើលបានលេចឡើងនៅលើអ៊ីនធឺណិតបានបង្ហាញថា ក្រុមបាតុករជនជាតិបង់ក្លាដែសបានប្រែក្លាយទៅជាចោរហើយដើរដង្ហែរជាមួយវត្ថុដែលពួកគេទទួលបាន។
មនុស្សរាប់ពាន់នាក់បានប្រតិកម្មទៅនឹងរូបភាពដែលគួរឱ្យស្អប់ខ្ពើមដែលបង្ហាញពីមនុស្សកាន់អាវទ្រនាប់ សម្ភារៈសម្លៀកបំពាក់ផ្សេងទៀត និងសូម្បីតែគម្ពីរគម្ពីគូរ៉ានដែលត្រូវបានលួចពីគេហដ្ឋានរបស់អតីតនាយករដ្ឋមន្ត្រី។ អ្នកប្រើប្រាស់ X ម្នាក់បានសរសេរថា “ពួកគេមិនបានលួចផ្ទះនាយករដ្ឋមន្ត្រីទេ ពួកគេបានលួចប្រទេសរបស់គេ”។ មិនយូរប៉ុន្មាន មានម្នាក់ទៀតបានបន្ថែមថា “អ្នកទាំងនេះបានក្លាយទៅជាចោរ មិនមែនធ្វើបដិវត្តន៍ទេ” ៕
ប្រែសម្រួលៈ ណៃ តុលា
