យេរ៉ូសាឡឹម៖ អ៊ីស្រាអែលបានធ្វើសមយុទ្ធមួយកាលពីថ្ងៃអង្គារ ដើម្បីរៀបចំសម្រាប់ការចែកចាយកញ្ចប់អាហារសង្គ្រោះបន្ទាន់ ក្នុងករណីមានជម្លោះកើនឡើង នេះបើយោងតាមក្រសួងសេដ្ឋកិច្ច និងឧស្សាហកម្មអ៊ីស្រាអែល។
សមយុទ្ធនេះមានឈ្មោះថា “Bread of the Land” ពាក់ព័ន្ធនឹងការត្រួតពិនិត្យសារពើភ័ណ្ឌ និងការត្រៀមកញ្ចប់អាហារ ដែលរក្សាទុកនៅក្នុងសាខាសង្គ្រោះបន្ទាន់ នៃបណ្តាញផ្សារទំនើបធំៗរបស់ប្រទេសអ៊ីស្រាអែល។ ប្រទេសនេះ ក៏បានសាកល្បងវិធីសាស្រ្ត សម្រាប់ការដឹកជញ្ជូនកញ្ចប់ទាំងនេះទៅកាន់មជ្ឈមណ្ឌលចែកចាយតាមតម្រូវការផងដែរ។
អ៊ីស្រាអែល មានសាខាផ្សារទំនើបសង្គ្រោះបន្ទាន់ជាង ៤២០កន្លែង ដែលមានកញ្ចប់រាប់ម៉ឺនកញ្ចប់ដែលមានអាហារ និងផលិតផលប្រើប្រាស់ជាមូលដ្ឋានផ្សេងទៀត ដែលត្រៀមរួចជាស្រេចសម្រាប់ការចែកចាយភ្លាមៗដល់ប្រជាជន ដែលមិនអាចចាកចេញពីផ្ទះរបស់ពួកគេ។ កញ្ចប់សង្គ្រោះរួមមាន នំប៉័ង នំកែកឃឺ ទឹកដោះគោ UHT កាហ្វេ តែ ស្ករ អាហារទារក បន្លែកំប៉ុង ត្រីធូណា និងរបស់ចាំបាច់ផ្សេងៗទៀត។
ក្រសួងបានបញ្ជាក់ថា បច្ចុប្បន្ននេះមិនមានការខ្វះខាតស្បៀងអាហារក្នុងឃ្លាំងនោះទេ ហើយក៏មិនចាំបាច់ឱ្យសាធារណជនទិញលើសតម្រូវការប៉ុន្មានថ្ងៃដែរ៕
ប្រែសម្រួល ឈូក បូរ៉ា
