បរទេស៖ និស្សិតសាកលវិទ្យាល័យម្នាក់ត្រូវបានគេចាក់ និងដុតសម្លាប់ នៅក្នុងបន្ទប់មួយក្នុងខេត្ត Nonthaburi កាលពីថ្ងៃពុធ ដោយជនសង្ស័យត្រូវបានថត ជាប់ដោយកាមេរ៉ាសុវត្ថិភាព។
យោងតាមសារព័ត៌មាន Bangkok Post ចេញផ្សាយនៅថ្ងៃទី៩ ខែសីហា ឆ្នាំ២០២៤ បានឱ្យដឹងថា ហេតុការណ៍នេះបានកើតឡើងនៅក្នុងអគារ Apartment មួយក្នុងសង្កាត់ Muang នៃខេត្ត Nonthaburi ។ ប្រជាពលរដ្ឋបានប្រាប់ប៉ូលីស និងក្រុមអ្នកជួយសង្គ្រោះថា ពួកគេបានរកឃើញបុរសម្នាក់ស្លាប់ ដោយឆេះខ្លោចនៅក្នុងបន្ទប់នៅជាន់ទីប្រាំមួយ។
សាក្សីបានប្រាប់ប៉ូលិសថា ពួកគេបានធុំក្លិនផ្សែងនៅម៉ោងប្រហែល ៣ និង ៣០ នាទីរសៀលថ្ងៃពុធ។ ក្រោយពីប្រជាពលរដ្ឋបានចូលទៅក្នុង បន្ទប់ពន្លត់ភ្លើងហើយ ក៏ប្រទះឃើញបុរសម្នាក់ដេកផ្កាប់មុខដោយក្រណាត់រុំជុំវិញខ្លួន ។ គេបាននាំគាត់ចេញពីបន្ទប់ ហើយបានរកឃើញថា គាត់ស្លាប់បាត់ទៅហើយ។
សាកសពត្រូវបានភ្លើងឆេះយ៉ាងធ្ងន់ធ្ងរ និងមានស្នាមចាក់ចំនួន ៣កន្លែងគឺនៅលើថ្ងាស ចង្កា និងទ្រូងរបស់ជនរងគ្រោះ ។
ប៉ូលិសបាននិយាយថា កាមេរ៉ាសុវត្ថិភាពថតបានជនរងគ្រោះដើរ ត្រឡប់មកបន្ទប់របស់គាត់ ជាមួយជនសង្ស័យនៅម៉ោង ២ និង១៨នាទីរសៀល។ ពេលនោះគេឃើញជនសង្ស័យជិះម៉ូតូពណ៌ក្រហមនៅវេលាម៉ោង៣និង២០នាទីរសៀល ។ ម៉ូតូត្រូវបានគេរាយការណ៍ថា ត្រូវបានគេលួច។
ជនសង្ស័យត្រូវបានគេជឿថា ជាស្ត្រីដែលរៀននៅសាកលវិទ្យាល័យ ដូចគ្នានឹងជនរងគ្រោះ ៕
ប្រែសម្រួលៈ ណៃ តុលា
