បរទេស៖ មេដឹកនាំកូរ៉េខាងជើង លោក គីម ជុងអ៊ុន បាននិយាយថា ប្រទេសកូរ៉េខាងជើងនឹងមិនស្វែងរកជំនួយពីខាងក្រៅ (អន្តរជាតិ) ដើម្បីសង្គ្រោះពីទឹកជំនន់ដែលបានបំផ្លិចបំផ្លាញ តំបន់នៅជិតព្រំដែនរបស់ប្រទេសជាមួយប្រទេសចិននោះទេ ខណៈដែលលោកបានបញ្ជាឱ្យមន្ត្រីនាំអ្នកស្រុករងគ្រោះរាប់ពាន់នាក់ដែលផ្លាស់ទីលំនៅទៅកាន់រដ្ឋធានីដើម្បីផ្តល់ការថែទាំឱ្យកាន់តែប្រសើរឡើង។
យោងតាមសារព័ត៌មាន VOA ចេញផ្សាយនៅថ្ងៃទី១០ ខែសីហា ឆ្នាំ២០២៤ បានឱ្យដឹងថា លោក គីម ជុងអ៊ុន បាននិយាយថា វានឹងចំណាយពេលប្រហែល ២ ទៅ ៣ខែ ដើម្បីសាងសង់ផ្ទះឡើងវិញ និងរក្សាលំនឹងតំបន់ដែលរងផលប៉ះពាល់ដោយទឹកជំនន់។ ទីភ្នាក់ងារសារព័ត៌មានមជ្ឈិមកូរ៉េខាងជើងបានផ្សាយថ្ងៃសៅរ៍ថា រហូតមកដល់ពេលនោះ រដ្ឋាភិបាលរបស់លោក គីម គ្រោងនឹងទទួលប្រជាជនរងគ្រោះប្រហែល ១៥.៤០០នាក់ ដែលជាក្រុមដែលរួមមានម្តាយ កុមារ មនុស្សចាស់ និងទាហានពិការ នៅឯកន្លែងនានាក្នុងទីក្រុងព្យុងយ៉ាង។
សារព័ត៌មាន KCNA បានផ្សាយលោក គីម បានធ្វើអត្ថាធិប្បាយក្នុងអំឡុងពេលដំណើរកម្សាន្តរយៈពេលពីរថ្ងៃទៅកាន់ទីក្រុង Uiju ភាគពាយ័ព្យរហូតដល់ថ្ងៃសុក្រ ដើម្បីជួបជនរងគ្រោះដោយទឹកជំនន់ និងពិភាក្សាអំពីកិច្ចខិតខំប្រឹងប្រែងស្តារឡើងវិញ។ ទីភ្នាក់ងារនេះបានផ្តល់ការសរសើរចំពោះលោក គីម ដោយនិយាយថា ដំណើរទស្សនកិច្ចនេះបានបង្ហាញពី “ការដឹកនាំដ៏ពិសិដ្ឋ” និង “សេចក្តីស្រឡាញ់ដ៏កក់ក្តៅ និងស្មារតីដ៏អស្ចារ្យនៃការធ្វើឱ្យសេវាលះបង់សម្រាប់ប្រជាជន” ។
របាយការណ៍របស់ប្រព័ន្ធផ្សព្វផ្សាយរដ្ឋបាននិយាយថា ភ្លៀងធ្លាក់ខ្លាំងនៅចុងខែកក្កដាបានធ្វើឱ្យផ្ទះចំនួន ៤.១០០ខ្នង ផ្ទៃដីកសិកម្មជិត ៣.០០០ហិកតា និងអគារសាធារណៈជាច្រើនផ្សេងទៀត រចនាសម្ព័ន្ធផ្លូវ និងផ្លូវដែក បានជន់លិចនៅក្នុងទីក្រុង Sinuiju ភាគពាយ័ព្យ និងទីក្រុង Uiju ។
កូរ៉េខាងជើងមិនបានផ្តល់ព័ត៌មានអំពីការស្លាប់នោះទេ ប៉ុន្តែលោក គីម ជុងអ៊ុន ត្រូវបានដកស្រង់សម្តីដោយបន្ទោសមន្ត្រីសាធារណៈ ដែលបានធ្វេសប្រហែសក្នុងការការពារគ្រោះមហន្តរាយចំពោះការបង្ក “គ្រោះថ្នាក់ដែលមិនអាចអនុញ្ញាតបាន”។
សម្ព័ន្ធមិត្តប្រពៃណីរុស្ស៊ី និងចិន ក៏ដូចជាក្រុមជំនួយអន្តរជាតិ បានស្នើផ្តល់ជំនួយសង្គ្រោះដល់កូរ៉េខាងជើង ប៉ុន្តែកូរ៉េខាងជើងមិនបានបង្ហាញជាសាធារណៈនូវបំណងចង់ទទួលពួកគេឡើយ៕
ប្រែសម្រួលៈ ណៃ តុលា
