បរទេស៖យោងតាមការចេញផ្សាយរបស់ RT ដែលបានដកស្រង់ព័ត៌មានចេញពីកាសែត Vedomosti រាយការណ៍ថា លោកស្រីCherie Blair ភរិយារបស់អតីតនាយករដ្ឋមន្ត្រីអង់គ្លេស Tony Blair កំពុងតំណាងឱ្យមហាសេដ្ឋីរុស្ស៊ី Mikhail Fridman ដែលត្រូវបានដាក់ទណ្ឌកម្មនៅក្នុងការតស៊ូផ្លូវច្បាប់របស់គាត់ជាមួយប្រទេសលុចសំបួលើទ្រព្យសម្បត្តិដែលបង្កកមានតម្លៃរាប់ពាន់លានដុល្លារ។
កាសែតរុស្ស៊ីបានរាយការណ៍ដោយដកស្រង់ឯកសារផ្លូវច្បាប់ថាលោកស្រី Blair កំពុងធ្វើសកម្មភាពជំនួសពាណិជ្ជកររុស្សីរូបនេះនៅក្នុងបណ្តឹងជុំវិញការសម្រេចចិត្តរបស់រដ្ឋក្នុងការបង្កកទ្រព្យសម្បត្តិរបស់គាត់ បន្ទាប់ពីការដាក់ទណ្ឌកម្មរបស់សហភាពអឺរ៉ុបប្រឆាំងនឹងគាត់នាពេលកន្លងមក។
ស្ថាបនិកក្រុមហ៊ុន Alfa Group ដែលជាក្រុមហ៊ុនវិនិយោគឯកជនដ៏ធំបំផុតមួយរបស់រុស្ស៊ី បានដាក់ពាក្យប្តឹងអាជ្ញាកណ្តាលអន្តរជាតិប្រឆាំង នឹងប្រទេសលុចសំបួរកាលពីថ្ងៃអង្គារដើម្បីស្វែងរកសំណងជិត១៥ ពាន់លានអឺរ៉ូឬត្រូវជា១៦ពាន់លានដុល្លារ។
លោកបានអះអាងថា លោកបានរងការខាតបង់យ៉ាងខ្លាំង បន្ទាប់ពីប្រទេសលុចសំបួបានអនុវត្តទណ្ឌកម្មដែលមិនច្បាស់លាស់និងគ្មានមូលដ្ឋាន របស់សហភាពអឺរ៉ុបប្រឆាំងនឹងលោក។
យោងតាមការបញ្ជាក់ដោយមហាសេដ្ឋីរូបនេះ ការដាក់ទណ្ឌកម្មប្រឆាំងនឹងគាត់គឺដោយសារតែភាពជាពលរដ្ឋរុស្ស៊ីរបស់គាត់ និងជោគជ័យក្នុងអាជីវកម្មតែប៉ុណ្ណោះ ហើយលោកបានថ្កោលទោសទង្វើនេះ ថាជារឿងអយុត្តិធម៌ធ្ងន់ធ្ងរនិងជាការរំលោភច្បាប់អន្តរជាតិ៕
ប្រែសម្រួល៖ស៊ុនលី
