បរទេស៖ មេធាវីគឺលោក Winyat Chartmontri បាននិយាយកាលពីថ្ងៃសៅរ៍ថា អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា ត្រូវបានរួមបញ្ចូលនៅក្នុងការលើកលែងទោសរបស់ព្រះមហាក្សត្រសម្រាប់អ្នកទោស ហើយការដោះលែងរបស់គាត់នឹងបញ្ចប់នៅថ្ងៃអាទិត្យ។
យោងតាមសារព័ត៌មាន បាងកក ប៉ុស្តិ៍ ចេញផ្សាយកាលពីថ្ងៃទី១៧ ខែសីហា ឆ្នាំ២០២៤ បានឱ្យដឹងថា ការដោះលែងលោកថាក់ស៊ីនត្រូវបញ្ចប់នៅចុងខែនេះ។ លោក Winyat បាននិយាយថា ការបញ្ចប់មុននេះ គឺជាផ្នែកមួយនៃការលើកលែងទោសពីព្រះមហាក្សត្រទូទៅសម្រាប់អ្នកទោសចំនួន ៧.៥០០នាក់ ជាមួយនឹងអាកប្បកិរិយាល្អក្នុងឱកាសនៃថ្ងៃបុណ្យចម្រើនព្រះជន្មរបស់ព្រះមហាក្សត្រកាលពីខែមុន។
ដំណឹងនេះកើតឡើងមួយថ្ងៃបន្ទាប់ពីកូនស្រីរបស់លោកថាក់ស៊ីន គឺលោកស្រី ផែតងតាន អាយុ ៣៧ឆ្នាំ បានក្លាយជាមនុស្សក្មេងបំផុតមិនធ្លាប់ជាប់ឆ្នោតជានាយករដ្ឋមន្ត្រីថៃ។ លោកស្រីក៏ជាសមាជិកទីបីនៃគ្រួសារ ស៊ីណាវ៉ាត្រា ដែលកាន់តំណែងនេះដែរ។
លោកថាក់ស៊ីនអាយុ ៧៥ឆ្នាំ បានវិលត្រឡប់ទៅប្រទេសថៃកាលពីខែសីហាឆ្នាំមុនបន្ទាប់ពីការនិរទេសដោយខ្លួនឯងអស់រយៈពេល ១៥ឆ្នាំ ដោយបានស្ថិតនៅក្រៅឃុំ និងបានភៀសខ្លួនចេញពីប្រទេសក្នុងឆ្នាំ២០០៨ ដោយអះអាងថា គាត់មិនអាចទទួលបានការកាត់ក្តីដោយយុត្តិធម៌លើបទចោទប្រកាន់ផ្សេងៗដែលគាត់បាននិយាយថាមានហេតុផលនយោបាយ។
នៅថ្ងៃដែលគាត់ត្រឡប់ទៅទីក្រុងបាងកកវិញ លោកថាក់ស៊ីនត្រូវបានកាត់ទោសឱ្យជាប់ពន្ធនាគាររយៈពេលប្រាំបីឆ្នាំ – ក្រោយមកត្រូវបានកាត់បន្ថយមកត្រឹមមួយឆ្នាំក្រោមការលើកលែងទោសពីព្រះមហាក្សត្រ សម្រាប់ជម្លោះផលប្រយោជន៍ និងការរំលោភបំពានសិទ្ធិអំណាចក្នុងពេលកាន់អំណាចពីឆ្នាំ២០០១-២០០៦៕
ប្រែសម្រួលៈ ណៃ តុលា
