បរទេស៖ យោងតាមការចេញផ្សាយរបស់ RT អគ្គមេបញ្ជាការកងទ័ពជើងទឹករុស្ស៊ី លោក Aleksandr Moiseev បានជួបជាមួយសមភាគីឥណ្ឌា ឧត្តមនាវីឯក Dinesh K Tripathi និងមន្ត្រីយោធាផ្សេងទៀត ក្នុងអំឡុងដំណើរទស្សនកិច្ចទៅកាន់ទីក្រុង New Delhi ខណៈដែលប្រទេសទាំងពីរស្វែងរក វិធីពង្រឹងកិច្ចសហប្រតិបត្តិការ លើវិស័យការពារជាតិ និងដែនសមុទ្ររវាងគ្នា។
ដំណើរទស្សនកិច្ចនេះធ្វើឡើងប៉ុន្មានសប្តាហ៍ បន្ទាប់ពីនាយករដ្ឋមន្ត្រីឥណ្ឌា Narendra Modi បានធ្វើដំណើរទៅទីក្រុងមូស្គូ ដើម្បីជួបប្រធានាធិបតីរុស្ស៊ីលោក Vladimir Putin។
ក្នុងដំណើរទស្សនកិច្ចរបស់លោក Modi ភាគីទាំងពីរបានយល់ព្រមពង្រីក ទំនាក់ទំនងរួមទាំងវិស័យយោធា។ លោក Modi គ្រោងនឹងធ្វើដំណើរទៅកាន់ប្រទេសប៉ូឡូញ និងអ៊ុយក្រែននៅចុងសប្តាហ៍នេះផងដែរ។
កាសែតក្នុងស្រុក The Times of India បានកត់សម្គាល់កាលពីថ្ងៃអង្គារ ដោយដកស្រង់សម្តីមន្ត្រីថា ការពិភាក្សារវាងឧត្តមនាវីឯក Moiseev និងឧត្តមសេនីយ Anil Chauhan បានគូសបញ្ជាក់អំពីការប្តេជ្ញាចិត្តទៅវិញទៅមក ក្នុងការពង្រឹងសន្តិសុខដែនសមុទ្រ ធ្វើឱ្យស៊ីជម្រៅកិច្ចសហប្រតិបត្តិការយុទ្ធសាស្ត្រ និងជំរុញភាពជាដៃគូការពារជាតិ ឱ្យកាន់តែរឹងមាំរវាង ប្រទេសទាំងពីរហើយកិច្ចប្រជុំនេះ ក៏មានគោលបំណង ស្វែងរកមធ្យោបាយសម្រាប់ កិច្ចសហប្រតិបត្តិការកងទ័ពជើងទឹកដែរ៕
ប្រែសម្រួល៖ ស៊ុន លី
