តេអេរ៉ង់៖ ទីភ្នាក់ងារសារព័ត៌មាន Tasnim ពាក់កណ្តាលផ្លូវការ បានរាយការណ៍ថា អ៊ីរ៉ង់បានឲ្យដឹងថា ការឆ្លើយតបរបស់ខ្លួន ចំពោះការធ្វើឃាត មេដឹកនាំក្រុមហាម៉ាស់ លោក Ismail Haniyeh នឹងត្រូវបានផ្តល់ឱ្យតាមរបៀប ដែលអ៊ីស្រាអែលលើសពីការរំពឹងទុក។
បេសកកម្មអចិន្ត្រៃយ៍របស់អ៊ីរ៉ង់ទៅកាន់អង្គការសហប្រជាជាតិ នៅទីក្រុងញូវយ៉កបានធ្វើការកត់សម្គាល់ជាការឆ្លើយតបទៅនឹងសំណួររបស់កាសែត The Wall Street Journal កាលពីយប់ថ្ងៃអង្គារថា តើទីក្រុងតេអេរ៉ង់ មានចេតនាពន្យារពេលការសងសឹករបស់ខ្លួនប្រឆាំងនឹងអ៊ីស្រាអែល ចំពោះការធ្វើឃាតលោក Haniyeh រហូតដល់លទ្ធផលនៃការចរចា ដែលកំពុងបន្ត ស្តីពីការសម្រេចបាននូវ បទឈប់បាញ់នៅតំបន់ហ្គាហ្សា ឬយ៉ាងណា។
ប្រភពបានឲ្យដឹងថា ការឆ្លើយតបរបស់អ៊ីរ៉ង់ គួរតែសម្រេចបានលទ្ធផលច្បាស់លាស់ពីរ៖ ទីមួយ វាគួរតែដាក់ទណ្ឌកម្ម “អ្នកឈ្លានពាន សម្រាប់សកម្មភាពភេរវកម្ម និងការរំលោភលើអធិបតេយ្យភាពជាតិរបស់អ៊ីរ៉ង់” និងទីពីរ វាគួរតែបង្កើនអំណាចរារាំងរបស់ប្រទេស និងធ្វើឱ្យអ៊ីស្រាអែល “សោកស្តាយយ៉ាងខ្លាំង” ចំពោះសកម្មភាពរបស់ខ្លួន ដូច្នេះការពារការកើតឡើងវិញនៃ “ការឈ្លានពានបែបនេះ” នាពេលអនាគត។
ប្រភពបានកត់សម្គាល់ថា ការឆ្លើយតបរបស់អ៊ីរ៉ង់ ក៏គួរតែត្រូវបានផ្តល់ឱ្យក្នុងវិធីមួយ ដើម្បីជៀសវាងផលប៉ះពាល់អវិជ្ជមាន ដែលអាចកើតមានលើការ សម្រេចបាននូវបទឈប់បាញ់ ដែលមានសក្តានុពលនៅក្នុងតំបន់ហ្គាហ្សា។
របាយការណ៍បានបញ្ជាក់ថា “ការឆ្លើយតបរបស់អ៊ីរ៉ង់ ប្រហែលជានឹងមកក្នុង ពេលមួយ និងក្នុងលក្ខខណ្ឌមួយ និងលក្ខណៈដែលអ៊ីស្រាអែល រំពឹងទុកយ៉ាងតិចបំផុត ប្រហែលជានៅពេល ដែលភ្នែករបស់ពួកគេកំពុងសម្លឹងមើលលើមេឃ និងអេក្រង់របស់រ៉ាដា ពួកគេនឹងមានការភ្ញាក់ផ្អើលខ្លាំង”។
លោក Haniyeh ដែលបានទៅបំពេញទស្សនកិច្ចនៅអ៊ីរ៉ង់ ដើម្បីចូលរួមពិធីស្បថចូលកាន់តំណែងប្រធានាធិបតីអ៊ីរ៉ង់លោក Masoud Pezeshkian ត្រូវបានសម្លាប់កាលពីថ្ងៃទី៣១ ខែកក្កដា រួមជាមួយអង្គរក្សរបស់លោក នៅពេលដែលគេហដ្ឋានរបស់ពួកគេក្នុងទីក្រុងតេអេរ៉ង់ ត្រូវបានវាយប្រហារ។
អ៊ីរ៉ង់បានបន្ទោសអ៊ីស្រាអែល ចំពោះការវាយប្រហារនេះ ហើយបានសន្យាថា នឹងមានការឆ្លើយតបយ៉ាងខ្លាំង ប៉ុន្ដែអ៊ីស្រាអែល មិនបានបញ្ជាក់ ឬបដិសេធការជាប់ពាក់ព័ន្ធរបស់ខ្លួនក្នុងការវាយប្រហារនោះទេ៕
ប្រែសម្រួល ឈូក បូរ៉ា
