បរទេស ៖ ប្រធានរដ្ឋអាជ្ញា នៃតុលាការឧក្រិដ្ឋកម្មអន្តរជាតិ (ICC) គឺលោក Karim Khan បានអំពាវនាវដល់ចៅក្រមឱ្យធ្វើការសម្រេចចិត្តជាបន្ទាន់លើដីកាចាប់ខ្លួនមេដឹកនាំអ៊ីស្រាអែល និងក្រុមហាម៉ាស។
យោងតាមសារព័ត៌មាន RT ចេញផ្សាយនៅថ្ងៃទី២៥ ខែសីហា ឆ្នាំ២០២៤ បានឱ្យដឹងថា កាលពីខែឧសភា លោក Karim Khan បានដាក់សំណើចេញដីកាឲ្យនាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋមន្ត្រីការពារជាតិ អ៊ីស្រាអែល លោក Yoav Gallant ព្រមទាំងមន្ត្រីកំពូលរបស់ក្រុម Hamas , លោក Ismail Haniyeh លោក Yahya Sinwar និង Mohammed Deif ។ រដ្ឋអាជ្ញាបានអះអាងថា ពួកគេជាប់ទាក់ទងក្នុង “ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ” ដែលប្រព្រឹត្តនៅអ៊ីស្រាអែល និងតំបន់ ហ្គាហ្សា ។
ចាប់តាំងពីពេលនោះមក តុលាការបានផ្តល់ការអនុញ្ញាតដល់រដ្ឋចំនួន ១៨ រួមទាំងសហរដ្ឋអាមេរិក អាល្លឺម៉ង់ និងអាហ្វ្រិកខាងត្បូង ព្រមទាំងអង្គការ និងបុគ្គលរាប់សិបនាក់ ដើម្បីផ្តល់យោបល់ របស់ពួកគេអំពីយុត្តាធិការរបស់ ICC លើបញ្ហានេះ ដោយផ្តល់ឱ្យថា “ប៉ាឡេស្ទីន មិនអាចអនុវត្តយុត្តាធិការ ព្រហ្មទណ្ឌលើជនជាតិអ៊ីស្រាអែល ( ក្រោម) កិច្ចព្រមព្រៀងទីក្រុងអូស្លូ។
នៅក្នុងឯកសារ ដែលមានកម្រាស់ ៤៩ទំព័រ លោក Khan បានស្នើឱ្យចៅក្រមពន្លឿនដំណើរការនេះ ដោយសង្កត់ធ្ងន់ថា “ការពន្យារពេលដោយគ្មាន ហេតុផលណាមួយនៅក្នុងដំណើរ ការទាំងនេះធ្វើឱ្យប៉ះពាល់ដល់សិទ្ធិរបស់ជនរងគ្រោះ” ។
យ៉ាងណាក៏ដោយ ទាំងអ៊ីស្រាអែល និងក្រុមហាម៉ាស់បានច្រានចោល ការចោទប្រកាន់នៃឧក្រិដ្ឋកម្មសង្រ្គាម ដោយលោក Netanyahu បានរិះគន់ការចោទ ប្រកាន់នេះថាជា “ភាពអាម៉ាស់” ។ ចំណែកក្រុមហាម៉ាសបានបរិហារសំណើសុំដីកាចាប់ខ្លួនរបស់ Khan ដោយនិយាយថា វាស្មើនឹង “ជនរងគ្រោះជាមួយនឹងពេជ្ឈឃាត” ៕
ប្រែសម្រួលៈ ណៃ តុលា
