បរទេស ៖ យោងតាមការចេញផ្សាយ របស់ RT បុគ្គលិករដ្ឋាភិបាលរុស្ស៊ី មិនគួរប្រើកម្មវិធីផ្ញើសារណាមួយ សម្រាប់គោលបំណងផ្លូវការឡើយ ព្រោះថាគ្មាននរណាម្នាក់ក្នុងចំណោមពួកគេ មានសុវត្ថិភាពក្នុងលក្ខខណ្ឌ នៃសន្តិសុខព័ត៌មាន រួមទាំង Telegram ផងដែរ។
ការលើកឡើងដែលត្រូវបានធ្វើដោយ អ្នកនាំពាក្យវិមាន ក្រឹមឡាំង លោក Dmitry Peskov ក្នុងអំឡុងពេលដែលលោក បានថ្លែងជាមួយអ្នកសារព័ត៌មាន កាលពីថ្ងៃអង្គារអំពីការចាប់ខ្លួនស្ថាបនិក Telegram លោក Pavel Durov នៅប្រទេសបារាំង។
ទោះជាយ៉ាងណាក៏ដោយ លោកបានព្រមានថា បុគ្គលិករដ្ឋាភិបាល គួរតែបដិសេធ ពីការប្រើប្រាស់កម្មវិធី ផ្ញើសារណាមួយ នៅក្នុងការទំនាក់ទំនងផ្លូវការ ដោយកត់សម្គាល់ថា៖គ្មានអ្នកនាំសារណា ដែលអាចទុកចិត្តបាន គ្រប់គ្រាន់ដើម្បីផ្តល់ សុវត្ថិភាពព័ត៌មាន ហើយ Telegram គឺមិនមែនជាករណីតែមួយនោះដែរ។
រំលឹកដែរថាលោកDurov ត្រូវបានអាជ្ញាធរបារាំងចាប់ខ្លួន កាលពីថ្ងៃសៅរ៍ បន្ទាប់ពីបានមកដល់ទីក្រុងប៉ារីសពីប្រទេស Azerbaijan ដោយយន្តហោះឯកជន។ បុរសជនជាតិរុស្ស៊ីវ័យ ៣៩ឆ្នាំរូបនេះគឺជាអ្នកកាន់លិខិតឆ្លងដែន២ ក្នុងនោះមយជារបស់ប្រទេសបារាំង និងមួយទៀតជាប្រទេសអារ៉ាប់រួម ។
ទោះបីជាយ៉ាងណាក្តីប្រធានាធិបតី បារាំងលោក Emmanuel Macron បានអះអាងថា ការឃុំខ្លួនស្ថាបនិក Telegram គឺជាផ្នែកមួយនៃ ការស៊ើបអង្កេត របស់តុលាការដែលកំពុងបន្តហើយ មិនមានលក្ខណៈជាការសម្រេចចិត្តនយោបាយទេ៕
ប្រែសម្រួល៖ស៊ុនលី
