ដាកា៖ សមាគមរោងចក្រកាត់ដេរបង់ក្លាដែស និងអ្នកនាំចេញ (BGMEA) បានស្វែងរកប្រាក់កម្ចីពីរដ្ឋាភិបាលបណ្តោះអាសន្នរបស់ប្រទេស ដើម្បីទប់ទល់នឹងការខាតបង់ ដែលកើតឡើងដោយសារស្ថានភាពក្នុងស្រុកនាពេលថ្មីៗនេះ និងទឹកជំនន់ដែលកំពុងបន្តបំផ្លិចបំផ្លាញ។
ប្រធានក្រុមហ៊ុន BGMEA លោក Khandoker Rafiqul Islam បានស្វែងរកប្រាក់កម្ចីនៅពេលជួបជាមួយទីប្រឹក្សាហិរញ្ញវត្ថុ និងពាណិជ្ជកម្មរបស់រដ្ឋាភិបាលបណ្តោះអាសន្នលោក Salehuddin Ahmed កាលពីថ្ងៃអង្គារ។
ប្រធាន BGMEA បានឲ្យដឹងថា ពួកគេបានធ្វើការទាមទារចំនួន ៩ ចំណុចទៅកាន់រដ្ឋាភិបាលបណ្តោះអាសន្ន រួមទាំងជំនួយជាសាច់ប្រាក់ពី ១៨ ពាន់លានទៅ ១៩ ពាន់លានតាកា (ប្រហែល ១៥៨លានដុល្លារអាមេរិក) សម្រាប់មួយខែ ដើម្បីជួយពួកគេផ្តល់ប្រាក់ឈ្នួលដល់កម្មករ និងទប់ទល់នឹងការខាតបង់។
លោកបានលើកឡើងថា ទីប្រឹក្សាបានធានាពួកគេពីការពង្រីកកិច្ចសហប្រតិបត្តិការខ្ពស់បំផុតរបស់លោក នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានបន្ដថា រោងចក្រកាត់ដេរ ដែលត្រៀមរួចជាស្រេចរបស់ប្រទេស មិនអាចដំណើរការពេញរយៈពេលមួយសប្តាហ៍បាននោះទេ ដោយសារភាពចលាចលនយោបាយកាលពីដើមខែនេះ និងស្ថានភាពបច្ចុប្បន្ន រួមទាំងទឹកជំនន់ភ្លាមៗផងដែរ។
ប្រទេសបង់ក្លាដែស បានលេចចេញជាតួអង្គសំខាន់នៅក្នុងឧស្សាហកម្មកាត់ដេរពិភពលោក ដោយទទួលបានតំណែងរបស់ខ្លួនជាអ្នកនាំចេញសម្លៀកបំពាក់ធំជាងគេទីពីរនៅទូទាំងពិភពលោកបន្ទាប់ពីប្រទេសចិន។
ប្រទេសនៅអាស៊ីខាងត្បូងមួយនេះ មានរោងចក្រកាត់ដេរចំនួន ៣,៥០០ ដែលស្មើនឹង ៨៥ ភាគរយនៃចំនួនប្រហែល ៦២ពាន់លានដុល្លារអាមេរិកក្នុងការនាំចេញប្រចាំឆ្នាំរបស់ខ្លួន ដោយផ្គត់ផ្គង់ម៉ាកយីហោល្បីៗជាច្រើនរបស់ពិភពលោក៕
ប្រែសម្រួល ឈូក បូរ៉ា
