គៀវ៖ កងទ័ពអ៊ុយក្រែន បានរឹបអូសយកការតាំងទីលំនៅចំនួន ១០០ នៅក្នុងប្រទេសរុស្ស៊ី ចាប់តាំងពីពួកគេបានវាយលុកចូលទៅក្នុងព្រំដែនជាប់តំបន់ Kursk របស់ប្រទេសរុស្ស៊ី កាលពីថ្ងៃទី០៦ ខែសីហា នេះបើតាមសម្តីលោក Oleksandr Syrsky អគ្គមេបញ្ជាការនៃកងកម្លាំងប្រដាប់អាវុធអ៊ុយក្រែន។
លោក Syrsky ត្រូវបានដកស្រង់សម្តីដោយទីភ្នាក់ងារសារព័ត៌មាន Interfax-Ukraine ថា “យើងបន្តឆ្ពោះទៅមុខ ដោយធ្វើឱ្យមានការខាតបង់យ៉ាងសំខាន់លើកងទ័ពរុស្ស៊ី ទាំងផ្នែកកម្លាំងមនុស្ស និងឧបករណ៍” ។
យោងតាមលោក Syrsky ប្រទេសរុស្ស៊ី បានដាក់ពង្រាយឡើងវិញនូវកងទ័ពប្រហែល ៣០,០០០ នាក់ពីតំបន់ផ្សេងទៀតទៅកាន់តំបន់ Kursk ហើយឥឡូវនេះកំពុងព្យាយាមបង្កើតខ្សែការពារ នៅជុំវិញកងកម្លាំងអ៊ុយក្រែន។
ទន្ទឹមនឹងនេះ ក្រសួងការពារជាតិរុស្ស៊ី បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃអង្គារថា កងកម្លាំងពិសេស Akhmat របស់ខ្លួនបានធ្វើប្រតិបត្តិការឈ្លបយកការណ៍ដោយធានាបាននូវកម្ពស់បញ្ជាការនៅក្នុងស្រុក Sudzha ក្នុងតំបន់ Kursk ដែលពីមុនកាន់កាប់ដោយអ៊ុយក្រែន។
ទីភ្នាក់ងារសារព័ត៌មាន TASS បានរាយការណ៍ដោយដកស្រង់ប្រភពនៅកន្លែងកើតហេតុថា កម្ពស់នេះស្ថិតនៅចម្ងាយ ៤០០-៥០០ ម៉ែត្រពីទីតាំងជួរមុខរបស់អ៊ុយក្រែន៕
ប្រែសម្រួល ឈូក បូរ៉ា
