ប៉ារីស ៖ រដ្ឋអាជ្ញាសាធារណៈប៉ារីសលោក Laure Beccuau បានប្រកាសកាលពីយប់ថ្ងៃពុធថា លោក Pavel Durov ស្ថាបនិក និងជានាយកប្រតិបត្តិ នៃសេវាផ្ញើសារ Telegram ត្រូវបានដោះលែងកាលពីថ្ងៃពុធ បន្ទាប់ពីបានបង់ប្រាក់ធានាចំនួន ៥លានអឺរ៉ូ (ប្រហែល ៥,៦លានដុល្លារអាមេរិក) ប៉ុន្តែលោកត្រូវបានគេតម្រូវឱ្យ រាយការណ៍ទៅប៉ូលីសពីរដងក្នុងមួយសប្តាហ៍។
លោក Beccuau បានបន្ថែមថាលោក Durov ត្រូវបានដាក់ឱ្យស្ថិតនៅក្រោមការ ស៊ើបអង្កេតជាផ្លូវការលើការចោទប្រកាន់ចំនួន៦ ហើយលោកត្រូវបានហាមឃាត់មិន ឱ្យចាកចេញពីប្រទេសបារាំង ក្នុងអំឡុងពេលស៊ើបអង្កេតនោះទេ។
លោក Durov ត្រូវបានប៉ូលិសបារាំងចាប់ខ្លួន នៅព្រលានយន្តហោះមួយនៅក្រៅក្រុងប៉ារីសកាលពីយប់ថ្ងៃសៅរ៍។ លោក Beccuau បានឲ្យដឹងថា ស្ថាបនិក Telegram រូបនេះត្រូវបានចោទប្រកាន់ពីបទឧក្រិដ្ឋកម្មចំនួន ១២ រួមទាំងការខកខានក្នុងការធ្វើសកម្មភាពប្រឆាំងនឹងអ្នកប្រើប្រាស់ Telegram ដែលពាក់ព័ន្ធនឹងការគំរាមកំហែងតាមអ៊ីនធឺណិត ការចែករំលែករឿងផ្លូវភេទ និងការពាក់ព័ន្ធនឹងអំពើភេរវកម្មជាដើម។
លោក Beccuau បានលើកឡើងថា ការចាប់ខ្លួន នេះកើតឡើងនៅក្នុងបរិបទនៃការស៊ើបអង្កេតរបស់តុលាការ ដែលបានបើកនៅថ្ងៃទី០៨ ខែកក្កដាឆ្នាំ២០២៤” ។ រដ្ឋអាជ្ញាក្រុងប៉ារីស បានបន្ថែមថា វាក៏មានការព្រួយបារម្ភផងដែរ ចំពោះ “ការបដិសេធក្នុងការទំនាក់ទំនង តាមសំណើរបស់អាជ្ញាធរមានសមត្ថកិច្ច ព័ត៌មាន ឬឯកសារចាំបាច់សម្រាប់អនុវត្ត និងប្រតិបត្តិការ ដែលត្រូវបានអនុញ្ញាតដោយច្បាប់”។
ជាការឆ្លើយតបទៅនឹងការចាប់ខ្លួន ក្រុមហ៊ុន Telegram បានឲ្យដឹងនៅលើគណនី X របស់ខ្លួនថាក្រុមហ៊ុនគោរពតាមច្បាប់សហភាពអឺរ៉ុប រួមទាំងច្បាប់សេវាកម្មឌីជីថលផងដែរ”៕
ប្រែសម្រួល ឈូក បូរ៉ា
