បរទេស ៖ អនុប្រធានគណៈកម្មាធិការ យោធាមជ្ឈិមចិន លោក Zhang Youxia បាននិយាយថា ទីក្រុងវ៉ាស៊ីនតោន ត្រូវតែបញ្ឈប់កិច្ច សហប្រតិបត្តិការរបស់ខ្លួន ជាមួយយោធាកោះតៃវ៉ាន់ និងគោរពផលប្រយោជន៍ស្នូលរបស់ប្រទេសចិន ហើយលោកក៏បានហៅបញ្ហាកោះតៃវ៉ាន់គឺសំខាន់សម្រាប់ក្រុងប៉េកាំង ។
យោងតាមសារព័ត៌មាន RT ចេញផ្សាយនៅថ្ងៃទី២៩ ខែសីហា ឆ្នាំ២០២៤ បានឱ្យដឹងថា ក្នុងអំឡុងពេលកិច្ចប្រជុំជាមួយទីប្រឹក្សាសន្តិសុខជាតិអាមេរិក Jake Sullivan នៅទីក្រុងប៉េកាំង កាលពីថ្ងៃព្រហស្បតិ៍ លោក Zhang បានទាមទារឱ្យសហរដ្ឋអាមេរិក “បញ្ឈប់ការឃុបឃិតផ្នែកយោធា របស់ខ្លួនជាមួយកោះតៃវ៉ាន់ បញ្ឈប់ការបំពាក់អាវុធ និងបញ្ឈប់ការផ្សព្វផ្សាយពាក្យចចាមអារ៉ាមមិនពិតទាក់ទងនឹងចិន” ។ នេះបើយោងតាមការចុះផ្សាយដោយ ក្រសួងការពារជាតិចិន។
លោក Zhang បានបន្ថែមថា បញ្ហាកោះតៃវ៉ាន់ ដែលត្រូវបានទីក្រុងប៉េកាំង មើលឃើញថាជាផ្នែកដែលមិនអាចកាត់ផ្តាច់បាននៃប្រទេសចិន គឺជា “មូលដ្ឋានគ្រឹះនយោបាយ នៃទំនាក់ទំនងចិន-អាមេរិក” និង “ខ្សែក្រហមលេខមួយ ដែលមិនត្រូវឆ្លងកាត់”។ លោកបានសង្កត់ធ្ងន់ថា រដ្ឋាភិបាលក្រុងប៉េកាំង តែងតែព្យាយាមរក្សាសន្តិភាព និងស្ថិរភាព នៅច្រកសមុទ្រតៃវ៉ាន់ ប៉ុន្តែលោកបានព្រមានថា រឿងនេះនឹងមិនអាចទៅរួចនោះទេ ប្រសិនបើមានការប៉ុនប៉ងបំបែកតៃវ៉ាន់ ចេញពីប្រទេសដទៃទៀត។
លោក Zhang បាននិយាយថា “បេសកកម្ម និងកាតព្វកិច្ចរបស់កងទ័ព រំដោះប្រជាជនចិន គឺដើម្បីប្រឆាំងដាច់ខាត ចំពោះអ្នកគាំទ្រ នៃអ្វីដែលហៅថាឯករាជ្យភាព របស់កោះតៃវ៉ាន់ និងជំរុញការបង្រួបបង្រួម” ។ «យើងមានកាតព្វកិច្ចទប់ទល់នឹងការបង្កហេតុដោយមិនប្រុងប្រយ័ត្នរបស់កងកម្លាំងបំបែកខ្លួន»៕
ប្រែសម្រួលៈ ណៃ តុលា
