វ៉ាស៊ីនតោន ៖ អនុប្រធានាធិបតីអាមេរិកលោកស្រី កាម៉ាឡា ហារីស បានឲ្យដឹងថា លោកស្រី ប្រឆាំងនឹងគម្រោងទិញយកក្រុមហ៊ុនដែកថែបអាមេរិក US Steel Corp ដោយក្រុមហ៊ុនផលិតដែកដ៏ធំបំផុត របស់ប្រទេសជប៉ុន ដោយសន្យាថា នឹងកសាងសេដ្ឋកិច្ច ដែលល្អសម្រាប់មនុស្សវណ្ណៈការងារ ខណៈដែលការប្កួតប្រជែងរបស់លោកស្រី សម្រាប់សេតវិមានប្រឆាំងនឹងលោក ដូណាល់ ត្រាំ ឈានចូលមកដល់ដំណាក់កាលចុងក្រោយ។
ទាក់ទងនឹងផែនការរបស់ក្រុមហ៊ុន Nippon Steel Corp. លោកស្រី ហារីស ដែលជាបេក្ខភាពប្រធានាធិបតី របស់គណបក្សប្រជាធិបតេយ្យ បាននិយាយនៅឯការប្រមូល ផ្តុំយុទ្ធនាការ ទិវាពលកម្មនៅទីក្រុង Pittsburgh ថាក្រុមហ៊ុនផលិតរបស់សហរដ្ឋអាមេរិក គួរតែនៅតែជាកម្មសិទ្ធិ និងប្រតិបត្តិការក្នុងស្រុក ។
លោកស្រី ដោយសង្ឃឹមថា នឹងទទួលបានការគាំទ្រពីកម្មករកអាវខៀវ បានចូលរួមក្នុងព្រឹត្តិការណ៍នេះ ជាមួយប្រធានាធិបតីលោក ចូ បៃដិន ដែលបានបោះបង់ចោលការ ដេញថ្លៃរបស់លោក សម្រាប់អាណត្តិទីពីរនៅក្នុងខែកក្កដា ខណៈដែលលោកស្រីប្តេជ្ញាពង្រឹង វិស័យផលិតកម្មរបស់ប្រទេសនេះបន្ថែមទៀត ដោយលោកស្រីបានហៅ US Steel ថាជា “ក្រុមហ៊ុនប្រវត្តិសាស្ត្រ” ។
លោកស្រីបានបន្តថា “វាមានសារៈសំខាន់ សម្រាប់ប្រទេសជាតិរបស់យើង ក្នុងការរក្សាក្រុមហ៊ុនដែកថែប របស់អាមេរិកឲ្យរឹងមាំ ខ្ញុំមិនអាចយល់ស្របជាមួយប្រធានាធិបតី លោក បៃដិន បានទេ ហើយខ្ញុំនឹងតែងតែនៅពីក្រោយកម្មករដែក របស់អាមេរិក និងកម្មករទាំងអស់របស់អាមេរិក” ។
US Steel ដែលត្រូវបានបង្កើតឡើង ក្នុងឆ្នាំ១៩០១ មានទីស្នាក់ការកណ្តាលនៅទីក្រុងឧស្សាហកម្មក្នុងរដ្ឋ Pennsylvania ដែលជារដ្ឋសមរភូមិដ៏សំខាន់ នៅក្នុងការបោះឆ្នោតប្រធានាធិបតីថ្ងៃទី០៥ ខែវិច្ឆិកា។
ក្រុមហ៊ុនផលិតដែករបស់ជប៉ុន និងសហរដ្ឋអាមេរិក បានប្រកាសពីកិច្ចព្រមព្រៀងទិញយក ១៤,១ ពាន់លានដុល្លារកាលពីខែធ្នូ។ US Steel និងម្ចាស់ភាគហ៊ុនរបស់ខ្លួន បានគាំទ្រការកាន់កាប់ដែលនឹងធ្វើឱ្យវាកាន់តែមានការប្រកួតប្រជែងជាសកល និងបង្កើតក្រុមហ៊ុនផលិត ដែកថែបធំជាងគេទីបី របស់ពិភពលោកតាមបរិមាណ៕
