អ៊ុយក្រែន ​ព្យួរ​ការងារ​របស់ប្រធាន​ កង​ទ័ព​យន្តហោះគ្មានមនុស្សបើក ក្រោយពីសារព័ត៌មានផ្សាយថា គ្រួសារលោករស់នៅក្នុងប្រទេសរុស្ស៊ី

បរទេស៖ អ៊ុយក្រែន​បាន​ព្យួរ​ការងារ​របស់ ប្រធាន​កង​ទ័ព​យន្តហោះគ្មានមនុស្សបើក ឬ ដ្រូន​ បន្ទាប់​ពី​មាន​សេចក្តី​រាយការណ៍​ថា ​គ្រួសារ​របស់​លោក​រស់​នៅ​ក្នុង​ប្រទេស​រុស្ស៊ី។

យោងតាមសារព័ត៌មាន RT ចេញផ្សាយនៅថ្ងៃទី៤ ខែកញ្ញា ឆ្នាំ២០២៤ បានឱ្យដឹងថា ការ​សម្រេច​ចិត្ត​នេះ​ត្រូវ​បាន​ធ្វើ​ឡើង​បន្ទាប់​ពី ​កិច្ច​ប្រជុំ​គណៈ​កម្មាធិការ​សន្តិសុខ Verkhovna Rada , អគ្គ​សេនាធិការ​បាន​សរសេរ​ ក្នុង​សេចក្តី​ថ្លែងការណ៍​មួយ​នៅ​លើ Telegram កាល​ពី​ល្ងាច​ថ្ងៃ​អង្គារ។ វាបាននិយាយថា ឧត្តមសេនីយកំពូលរបស់អ៊ុយក្រែនគឺលោក Aleksandr Syrsky បានសម្រេចចិត្តថាសេវាសន្តិសុខអ៊ុយក្រែន (SBU) នឹង “ធ្វើការត្រួតពិនិត្យពិសេសបន្ថែម” ទាក់ទងនឹងលោក Roman Gladky ដែលជាប្រធានបុគ្គលិកនៃ កងកម្លាំងប្រព័ន្ធគ្មានមនុស្សបើក (USF) ។

អគ្គសេនាធិការបានបន្ថែមថា លោក Gladky នឹងត្រូវព្យួរពីភារកិច្ចផ្លូវការរបស់គាត់ សម្រាប់រយៈពេលនៃការត្រួតពិនិត្យនេះ ។

USF ត្រូវបានបង្កើតឡើងជាសាខាយោធា ដាច់ដោយឡែកមួយនៅក្នុងខែកុម្ភៈ។ លោក Gladky ដែលជាមន្ត្រីយោធាអាជីព ត្រូវបានដាក់ឱ្យទទួលខុសត្រូវលើផែនការ USF នៅក្នុងខែសីហា។

សូមជម្រាបថា ការស៊ើបអង្កេតនេះត្រូវបាន ចាប់ផ្តើមបន្ទាប់ពីប្រព័ន្ធផ្សព្វផ្សាយអ៊ុយក្រែន បានរាយការណ៍ថា ភរិយារបស់លោក Gladky មានលិខិតឆ្លងដែនរុស្ស៊ីហើយបានរស់នៅ ក្នុងឧបទ្វីបគ្រីមៀបន្ទាប់ពី ឧបទ្វីបនេះបានក្លាយជាផ្នែកមួយ នៃប្រទេសរុស្ស៊ីក្នុងឆ្នាំ២០១៤ ។ វាត្រូវបានគេរាយការណ៍ផងដែរថា កូនស្រីរបស់លោក Gladky បានចូលរួមក្នុងការប្រកួតហែលទឹកក្រោមទង់ជាតិរុស្ស៊ី។ ទីក្រុងគៀវចាត់ទុកតំបន់ Crimea ស្ថិតនៅក្រោមការកាន់កាប់ដោយខុសច្បាប់ និងហាមប្រាមការចូលមកកាន់ ឧបទ្វីបនេះដោយគ្មានការអនុញ្ញាត ៕

ប្រែសម្រួលៈ ណៃ តុលា