គៀវ ៖ ទីភ្នាក់ងារព័ត៌មាន Interfax-Ukraine បានរាយការណ៍ថា សភាអ៊ុយក្រែន កាលពីថ្ងៃពុធ បានបណ្តេញសមាជិករដ្ឋាភិបាលចំនួន ៤រូប ចេញពីតំណែង ដែលជាការបន្ដបោសសម្អាតមន្រ្តី រដ្ឋាភិបាលសម័យសង្គ្រាម ក្រោមការដឹកនាំ របស់លោក វូឡូឌីមៀ ហ្សេឡិនស្គី។
សមាជិកសភាបានបោះឆ្នោត បណ្តេញឧបនាយករដ្ឋមន្ត្រីទទួលបន្ទុកសមាហរណកម្មអឺរ៉ុប និងអឺរុប-អាត្លង់ទិកលោក Olha Stefanishyna រដ្ឋមន្ត្រីក្រសួងឧស្សាហកម្មយុទ្ធសាស្ត្រលោក Oleksandr Kamyshin រដ្ឋមន្ត្រីយុត្តិធម៌លោក Denys Malyuska និងរដ្ឋមន្ត្រីការពារបរិស្ថាន និងធនធានធម្មជាតិលោក Ruslan Strelets ។
សភាមិនបានពិចារណា លើការបណ្តេញរដ្ឋមន្ត្រីការបរទេសលោក Dmytro Kuleba ដែលបានដាក់សំណើលាលែងពីតំណែងមុនថ្ងៃនោះទេ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
នៅក្នុងនោះដែរ ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានលើកឡើងថា ការរុះរើគណៈរដ្ឋមន្ត្រីមានគោលបំណង “ពង្រឹងអ៊ុយក្រែននៅដំណាក់កាលផ្សេងៗគ្នា”៕
ប្រែសម្រួល ឈូក បូរ៉ា
