បរទេស៖ រដ្ឋមន្ត្រីការបរទេសអាមេរិក លោក Antony Blinken បានប្រកាសកាលពីថ្ងៃអង្គារថា សហរដ្ឋអាមេរិកនឹងដាក់ទណ្ឌកម្មថ្មីលើប្រទេសអ៊ីរ៉ង់ជាការឆ្លើយតបទៅនឹងការចោទប្រកាន់ទៅលើទីក្រុងតេហេរ៉ង់ នូវការផ្គត់ផ្គង់មីស៊ីលទៅកាន់ទីក្រុងម៉ូស្គូ។ យ៉ាងណាក៏ដោយ អ៊ីរ៉ង់បានច្រានចោលការចោទប្រកាន់នេះ និងថា វាជា “សង្គ្រាមចិត្តសាស្ត្រ” ។
យោងតាមសារព័ត៌មាន RT ចេញផ្សាយនៅថ្ងៃទី១០ ខែកញ្ញា ឆ្នាំ២០២៤ បានឱ្យដឹងថា ថ្លែងទៅកាន់អ្នកសារព័ត៌មានកាលពីថ្ងៃអង្គារ លោក Blinken បានអះអាងថា អ៊ីរ៉ង់បានបញ្ជូនមីស៊ីលផ្លោងរយៈចម្ងាយខ្លី Fath-360 មិនដឹងចំនួនដល់ទៅរុស្ស៊ី។
លោក Antony Blinken បាននិយាយថា “យើងបានព្រមានទីក្រុង តេហេរ៉ង់ជាសាធារណៈ យើងបានព្រមានទីក្រុង តេហេរ៉ង់ ជាលក្ខណៈឯកជនថា ការចាត់វិធានការនេះនឹងក្លាយជាការកើនឡើងដ៏គ្រោះថ្នាក់” ។ «ឥឡូវនេះ រុស្ស៊ីបានទទួលការដឹកជញ្ជូនកាំជ្រួចទាំងនេះ ហើយទំនងជានឹងប្រើវាក្នុងរយៈពេលប៉ុន្មានសប្តាហ៍ក្នុងប្រទេសអ៊ុយក្រែន»។
លោក Blinken បានបន្តថា ទណ្ឌកម្មថ្មីនឹងត្រូវប្រកាសនៅពេលក្រោយនៅថ្ងៃអង្គារ។ លោកបានកត់សម្គាល់ថា ក្នុងចំណោមអង្គភាពដែលត្រូវបានគេកំណត់គោលដៅនឹងមានក្រុមហ៊ុនអាកាសចរណ៍ជាតិរបស់សាធារណរដ្ឋឥស្លាម Iran Air។
ព័ត៌មាននៃការចែកចាយមីស៊ីលត្រូវបានរាយការណ៍ជាលើកដំបូងកាលពីថ្ងៃសុក្រសប្តាហ៍មុនដោយកាសែត Wall Street Journal ។ អ្នកនាំពាក្យសហភាពអឺរ៉ុបបានបញ្ជាក់ពីរបាយការណ៍នេះកាលពីថ្ងៃចន្ទ បន្ទាប់ពីលោក Blinken នៅថ្ងៃអង្គារ។
យ៉ាងណាក៏ដោយ អ៊ីរ៉ង់បដិសេធយ៉ាងដាច់ អហង្ការចំពោះការចោទប្រកាន់នេះ។ មេបញ្ជាការយោធាជាន់ខ្ពស់អ៊ីរ៉ង់លោក Fazlollah Nozari បានប្រាប់ប្រព័ន្ធផ្សព្វផ្សាយអ៊ីរ៉ង់កាលពីថ្ងៃចន្ទថា “គ្មានមីស៊ីលណាមួយត្រូវបានបញ្ជូនទៅប្រទេសរុស្ស៊ីទេ ហើយការអះអាងនេះគឺជាប្រភេទនៃសង្គ្រាមចិត្តសាស្ត្រ” ។ លោក Nozari បានបន្ថែមថា “អ៊ីរ៉ង់មិនគាំទ្រភាគីណាមួយនៃជម្លោះអ៊ុយក្រែន និងរុស្ស៊ី នោះទេ”៕
ប្រែសម្រួលៈ ណៃ តុលា
