បរទេស៖ យោងតាមការចេញផ្សាយរបស់ RT សមាជិកព្រឹទ្ធសភារុស្ស៊ី លោក Aleksey Pushkov បាននិយាយថា រដ្ឋាភិបាលទីក្រុងវ៉ាស៊ីនតោន និងទីក្រុងឡុងដ៍ ប្រហែលជាបានសម្រេចចិត្តរួចហើយ ក្នុងការអនុញ្ញាតឱ្យទីក្រុងគៀវ ប្រើប្រាស់មីស៊ីលរយៈចម្ងាយឆ្ងាយ សម្រាប់ការវាយប្រហារយ៉ាងជ្រៅ នៅក្នុងប្រទេសរុស្ស៊ី ហើយឥឡូវនេះកំពុងបង្កើតការនិទានរឿង តាមរយៈប្រព័ន្ធផ្សព្វផ្សាយទៀតផង។
កាសែតក្នុងស្រុក The Guardian បានរាយការណ៍កាលពីថ្ងៃពុធ ដោយដកស្រង់ប្រភពរដ្ឋាភិបាលអនាមិកថា ចក្រភពអង់គ្លេសបានផ្តល់ភ្លើងខៀវ សម្រាប់ការប្រើប្រាស់មីស៊ីល Storm Shadow រួចហើយប៉ុន្តែ ទោះជាយ៉ាងណាក៏ដោយ ទីក្រុងឡុងដ៍មិនត្រូវបានគេរំពឹងថា នឹងប្រកាសការផ្លាស់ប្តូរនេះជាសាធារណៈនោះទេ។
លោក Pushkov បានសរសេរនៅលើ Telegram កាលពីថ្ងៃពុធថា៖ ការសម្រេចចិត្តវាយលុកទឹកដីរុស្ស៊ី កំពុងត្រូវបានរៀបចំយ៉ាងច្បាស់ ។មានការសន្ទនា និងការណែនាំច្រើនពេកអំពីវា ដែលវាអាចបញ្ច្រាស់បាន។ ទោះបីជាមិនទាន់បានបង្កើតឡើងក៏ដោយ ហាក់ដូចជានឹងមានបញ្ហាច្រើនថ្ងៃ។ ការលេចធ្លាយតាមរយៈ The Guardian មិនមែនជារឿងចៃដន្យទេ។
ការដាក់កំហិតលើការប្រើប្រាស់អាវុធ ដែលផ្គត់ផ្គង់ដោយលោកខាងលិច ដើមឡើយត្រូវបានដាក់ឱ្យដំណើរការ ដើម្បីអនុញ្ញាតឱ្យសហរដ្ឋអាមេរិក និងសម្ព័ន្ធមិត្តអះអាងថា ពួកគេមិនពាក់ព័ន្ធដោយផ្ទាល់ នៅក្នុងជម្លោះជាមួយរុស្ស៊ី ខណៈពេលដែលផ្តល់អាវុធដល់អ៊ុយក្រែនដល់ទៅ ២០០ពាន់លានដុល្លារ។ ទោះជាយ៉ាងនេះក្តី ទីក្រុងគៀវបានកំពុងទាមទារឱ្យមានការដកការរឹតបន្តឹង ចាប់តាំងពីខែឧសភាមក។
យោងតាមកាសែត The Guardian រដ្ឋមន្ត្រីការបរទេសអាមេរិកលោក Antony Blinken ៖បានផ្តល់តម្រុយខ្លាំងបំផុត អំពីការអនុញ្ញាតឱ្យអ៊ុយក្រែនប្រើមីស៊ីល ATACMS រយៈចម្ងាយឆ្ងាយប្រឆាំងនឹងរុស្ស៊ី ក្នុងអំឡុងពេលដំណើរទស្សនកិច្ចរបស់គាត់ ទៅកាន់ទីក្រុងគៀវកាលពីថ្ងៃពុធ។ ការសម្រេចចិត្តនេះត្រូវបានគេយល់ថា ត្រូវបានធ្វើឡើងជាលក្ខណៈឯកជនរួចហើយ៕
ប្រែសម្រួល៖ ស៊ុន លី
